URBAN.AZ
URBAN.AZ

Telegram Banner

Bakıda bir neçə saatlıq elektrik enerjisi kəsildikdə xaos baş verir və inqlab yaxınlaşır. Bununla bərabər, hal-hazırda Azərbaycanda elektrik enerjisinin nə olduğunu bilməyən çoxlu sayda kənd var.

Məsələn, Hirkan Milli Parkında hətta rəsmi statusu belə olmayan kəndlər var. Onların birində beş, digərində isə yeddi ailə yaşayır.

Buranın yerli sakinləri babalarının əsrlər boyu yaşadıqları kimi yaşayır: meşələrdə mal-qara otarır, bal yığmaqla məşğul olur, meyvə və tərəvəz əkirlər. Lakin bəziləri bu həyata uyğunlaşa bilməyib, köçürlər. 

"Kəndimizdə elektrik enerjisi olsaydı, buradan köçmiş sakinlər buraya qayıdardı. Uşaqlar təhsil ala, kitab oxuya, kinoya baxa bilərdi. Bizim soyuducularımız olsaydı, yayda normal qidalana bilərdik. Belə isə biz nə ət, nə də süd saxlaya bilirik",- deyə yerli sakinlərdən biri gileylənir

Telefon üçün zaryadkanı buraya at belində gətirirlər, yağ generatorlarından istifadə edirlər. Lakin qışda hətta atlar belə bu yollarda hərəkət edə bilmir.

Bununla bərabər, yerli sakinlər öz evlərini tərk edib getmək istəmir. Və ya edə bilmir.

Burada elektrik və ya sivilizasiyanın digər nailiyyətləri yoxdur. 2010-cu ildən ailəsi ilə birlikdə Azərbaycanda yaşayan və hətta artıq Azərbaycan dilini belə öyrənən Norveçli Knut-Erlend Rosvold bu diyara gəlməsəydi, buranın sakinləri uzun müddət elektrik enerjisinin nə olduğunu bilməyəcəkdir.

Knut Azərbaycanda alternativ enerji mənbələrinin inkişafı üzrə ixtisaslaşan Provitaz şirkətini təsis edir. Lənkaranda layihələrin birinin həyata keçirilməsi zamanı o, burada elektriksiz kəndlərin mövcudluğunu öyrənir. Və o, həmin kəndləri ziyarət etmək qərarına gəlir.

Vəziyyəti qiymətləndirdikdən sonra Knut günəş panellərini Azərbaycan kəndlərinə təmənnasız gətirmək və quraşdırmaq qərarına gəlir.

Bu zaman şirkətin özünün satın aldığı akkumulyatorların alınması ilə bağlı sual meydana gəlir. Bunun üçün 17 min dollar tələb olunurdu.

14 may 2019-cu il tarixində bu norveçli sahibkar akkumulyatorlar üçün pul toplamaq məqsədilə crowdfunding (könüllülərdən kütləvi pul yığımı) elan edir. Təəssüf ki, hazırda kiçik bir məbləğ toplanmışdır. Qarşıdan isə qış gəlir, Azərbaycan kəndlərinin sakinləri yenə də elektriksiz yaşamalı olacaq.

Lakin Knut layihəni gec-tez başa çatdıra biləcəyinə inanır:

"Ümid edirik ki, ən azı bir kəndi elektrik enerjisi ilə təmin etdikdən sonra digər təşkilatlar üçün nümunə olacağıq və maliyyə dəstəyi sayəsində digər kəndlərin də problemlərini həll edəcəyik".

Günəş panellərini artıq kəndlərə gətirilib. Kəndlilər isə hələ də bizə adi görünən elektrik enerjisini gözləyir.

Azərbaycan sakinlərinə kömək etmək istəyən hər kəs Knutun səhifəsinə girib bu layihənin hesabına istənilən məbləği köçürə bilər.


Şərhlər