Azərbaycanda qışın oğlan çağıdır və bizim kiçik qardaşlarımız gecələrin soyuğundan qorunmaq üçün sığınacaq axtarmalı olurlar. Çox vaxt pişiklər avtomobil kapotunun altında gizlənir ki, bu da avtomobil sahibinin xəbərsizliyi səbəbindən heyvanın ölümünə səbəb ola bilər. Son zamanlar Bakının müxtəlif yerlərində evsiz pişiklər üçün evciklər qurulur.
2018-ci ilin Noyabr ayından etibarən İçərişəhər ərazisində IDEA Heyvanlara Qayğı Mərkəzinin dəstəyi ilə Pişik Evi layihəsi həyata keçirilir. İçərişəhərdə pişik evcikləri taxtadan və qışda istiliyi, yayda isə sərinliyi saxlayan penoplast və keçədən hazırlayırlar. Bu pişik "mənzillərinin" damı şiferlə örtülür. Evciklərdə həmişə su və yemək var və hər kəs heyvanları yemləyə bilər.
Sahibsiz pişiklər üçün sığınacaq yaratmaq ideyasını Nərimanov rayon sakini Ləman Ağayeva dəstəkləyib. Elcom Group qrafik dizayn və reklam şirkəti ilə birlikdə o, Nərimanov parkında ilk evciyi düzəldib (Aşıq Molla Cümə küçəsi). Nərimanov rayonunun müxtəlif yerlərində daha 9 evciyin quraşdırılması planlaşdırılır.
Bakı sakini Cəmil Hüseynov avtomobil təkərlərindən pişik evcikləri düzəldib. Bu evciklərə heyvanlar əlverişsiz hava şəraiti zamanı sığına bilərlər.
"İki təkər bir-birinə bərkidilib. Evciyin üst və alt tərəfləri diktlə bağlanmışdır. Yağışdan qorunması üçün diktə lak çəkilmişdir. Pişiklərin zədələnməməsi üçün bütün vintlərin ucları kəsilib. Yağışın və qarın sığınacağa girməməsi üçün şinlərə günlük (козырек) bağlanmışdır".
Cəmil Hüseynov
"Azadlıq" metro stansiyasının yaxınlığındakı həyətlərin birində, qayğıkeş insanlar pişiklər üçün karton evciklər qurub. Bu sığınacaqlar heyvanları dərhal cəlb edib. Evciklərdə miqdarı daim yenilənən təmiz su və yem var.
Nara Cavadova küçə pişikləri üçün sifarişlə düzəldilmiş evciklərin fotolarını paylaşıb.
Heyvanların taleyi yalnız böyükləri deyil, həm də yaxşı işlər görməyə hazır olan uşaqları da narahat edir. Belə ki, Bakı şəhərinin 4-cü mikrorayonundakı həyətlərin birində bir uşaq qutudan və plastik torbadan pişiklər üçün sığınacaq düzəldib. O, həmin sığınacağın üstünə: "Sahibsiz itlər və pişiklər üçün ev. Onlara özünüzə göstərdiyiniz qayğı qədər qayğı göstərin",- sözlərini yazıb.
Bu evciyi isə Yasamal rayonundakı həyətlərin birində ("Kaktus" restoranının yaxınlığında) 14 yaşlı Məzahir qurub. O, yoldaşlarından pişiklərin qışı daha rahat keçirə bilməsi üçün birlikdə heyvanlara gündəlik yemək almalarını xahiş edib.
Biləcəridə isə (Kristal Abşeron) pişikləri əsl malikanəyə yerləşdiriblər. Suya davamlı dam örtüyünə malik ikimərtəbəli evcik ilk sakinlərinin ürəyincə olub.
Bakıdakı pişik evciklərini görmüsünüzmü? Həyətinizdəki pişiklər üçün belə evciklər düzəltmək istəmirsinizmi?
