"Dəniz Mall" adlı yeni ticarət mərkəzinin açılışı martın 12-si saat 15:00-a təyin edilmişdir, lakin... Ölkədə koronavirusun yayılmasının qarşısının alınması istiqamətində dövlətin həyata keçirdiyi tədbirlərə dəstək olaraq Azərbaycan Nazirlər Kabineti yanında Əməliyyat Qərargahı Dəniz Mall-ın açılışının qeyri-müəyyən müddətə təxirə salındığını söyləyib.
URBAN şoppinq həvəskarlarını çoxdan maraqlandıran yeni ticarət mərkəzi ilə bağlı 5 fakt öyrənib.
1. Dəniz Mall 13 il əvvəl açılmalı imiş
Yeni ticarət mərkəzinin dizaynı Chapman Taylor şirkətinin direktoru Tim Karran tərəfindən hazırlanmışdır. Verdiyi müsahibələrin birində o, layihənin 2007-ci ildə gerçəkləşdirilməli olduğunu, lakin onun icrasına 2014-cü ildə yenidən başlandığını demişdir. Hazır planlar və çertyojlar öz icrasını yeddi il ərzində gözləyib.
2. Əsas kimi səkkizguşəli ulduz götürülüb
Səkkizguşəli ulduz Azərbaycanın Dövlət gerbində və Dövlət Bayrağında var. Ticarət mərkəzinin qeyri-adi forması məhz ondan götürülmüşdür. Ticarət mərkəzinin quruluşu, həmçinin dənizkənarı parkın rəmzinə, yəni " Mirvari" kafesinə də bənzəyir.
3. O, konqress mərkəzi olmalı idi
Ticarət mərkəzinin səkkiz "ləçəyi" eyni zamanda bir neçə böyük tədbirin keçirilməsinə imkan verəcək səkkiz geniş salondan ibarət olmalı idi. Sonradan bu fikirdən imtina edilmiş və əyləncə məkanının yaradılması qərara alınmnışdır.
4. Ən böyük ticarət mərkəzlərindən biri
Beşmərtəbəli "Dəniz Mall" ticarət mərkəzi 120 min kv. sahəni əhatə edir. Bu amil onu Bakının ən böyük ticarət və əyləncə mərkəzlərindən birinə çevirir. Hazırda Bakıda bu ölçüdə "Gənclik Mall" adlanan daha bir ticarət mərkəzi var. Gələcəkdə isə Ağ Şəhərdə bu ticarət mərkəzlərindən daha böyük və geniş Baku White City Mall ticarət mərkəzinin inşası gözlənilir.
5. Dünya brendləri
Şoppinq həvəskarları və dadlı yeməkləri sevənlər narahat olmasın: yeni ticarət mərkəzində təxminən 40 dünya brendi və 20-dən çox restoran yerləşəcək. Lakin Bakıda H&M şirkətinin filialının yaranmasına dair çoxdan bəslənilən ümidlər yenə də puça çıxdı: İsveç brendi bir daha paytaxtımızdan yan keçdi.
