URBAN.AZ

URBAN.AZ

İşdən evə tez çatmaq istəyirsiniz? Hansı taksi xidmətindən istifadə edəcəyinizi bilmirsiniz? URBAN sərbəst araşdırma aparıb. Biz Bakıda ən çox istifadə olunan 5 taksi xidmətini seçdik.

Beləliklə, adi bir çərşəmbə axşamı biz Nizami küçəsi 203B ünvanında yerləşən ofisimizdən Musabəyov parkına kimi getmək qərarına gəldik. Saat 18:50-də beş işçimizdən dördü telefonlarına yaxınlaşdılar...

1. 189 nömrəsinə zəng vurduq.

Operator ikinci çağırıdan sonra cavab verdi. Gediş haqqı ekonom-klasla 6,10 AZN müəyyən olundu.

18:52-də sifarişin qəbul olunduğu haqqında, 18:55-də isə artıq qara Mercedesin (maşının və sürücünün nömrəsi daxil olmaqla) bizi gözlədiyi barədə sms aldıq. Zəng vurub, sürücünün bizi gözlədyinə əmin olduq. Çağırış anından taksinin gəlişinə qədər cəmi 5 dəqiqə keçdi.

Lakin o 19:29-a kimi, qalan taksilərin gəlməsini gözləməli oldu.

Sürücü tamamilə qəribə marşrut seçdi.

Buna baxmayaraq, yarım saatdan bir az çox vaxt sərf edərək, saat 20:00-da son məntəqəyə çatdı. Bütün yolu sürücü sərnişini taksidə işi barəsində maraqlı əhvalatlarla əyləndirirdi. Əla təsürat bağışlayırdı. Bunda əlavə, gözlədiyi vaxta görə nə qədər artıq ödəməli olduğumuzu soruşanda bildirdi ki, bu tamamilə pulsuzdur.10 manatdan qalığı qaytararkən, 10 qəpıyı hesaba salmadı.

Beləliklə, 189 nömrəsi ilə çağırılmış taksi 31 dəqiqə və 6 manata başa gəldi. 

2. Telefonda 189 mobil tətbiqetməsini açdıq. 


Müsbət cəhət odur ki, mobil tətbiqetmə özü sizin yerləşdiyiniz nöqtəni müəyyən edir (ünvanı bilmək vacib deyil) və B nöqtəsini də bildirməyə ehtiyac yoxdur. Sadəcə, barmağınızı xəritədə son nöqtəyə sürüşdürməniz yetərlidir. Həmçinin, 3-cü ünvanı da seçmək imkanınız var. Sifariş 19:00-da qəbul olundu, qiymət isə ucuzluğu ilə bizi təəccübləndirdi - 5,20 AZN. 10 dəqiqədən sonra sifarişin təsdiqi, 2 dəqiqədən sonra isə “maşın sizi gözləyir” sms-ni aldıq. Proqram vasitəsilə taksi sifarişinin mənfi cəhəti - sms-də nə avtomobilin markası, nə dövlət nömrə nişanı, nə sürücünün telefon nömrəsi, nə də gediş haqqının göstərilməməsidir. Ancaq sms gələndən dərhal sonra sürücü özü zəng vurdu. Mədəni şəkildə, supermarketin (biznes mərkəzinin) yanında, ağ Mercedesdə gözlədiyini bildirdi. Çağırış anından taksinin gəlişinə qədər 12 dəqiqə keçdi.

15 dəqiqə gözlədi. 19:27-də əməkdaşımız maşına əyləşən zaman taksi sürücüsü ondan maşını tapmaqda çətinlik çəkib-çəkmədiyini və rahat yerdə saxlayıb-saxlamadığını dəqiqləşdirdi.

Aşağıdakı marşrutla hərəkət elədi:

Bu vaxt hərəkət sıxlığı olduğuna görə, maşın çox ləng hərəkət edirdi. Gözləməyə görə sürücü əlavə pul almadı, üstəlik başqa xırda pulu olmadığına görə bizdən cəmi 5 AZN götürdü. Yolda sərnişinin həyatı ilə maraqlanır, öz uşaqlarından danışırdı. 

Beləliklə, 189 mobil tətbiqetməsi vasitəsilə çağırılan taksi bizə 5 AZN və 30 dəqiqəyə başa gəldi.

3. TaxiTap mobil tətbiqetməsini açdıq.


18:59-da bizim sifarişimiz qəbul olundu. 19:02-də bizim üçün sürücü və məbləğ - 5,40 AZN təyin edildi. Əlavədə həmçinin, maşının markası (göy rəngli Opel Astra) , sürücünün adı və mobil nömrəsi göstərilmişdi. Və biz real zamanda onun harda olduğunu izləyə bilərdik. Nəyə görəsə, sürücü o qədər də yaxında deyildi. O, Heydər Əliyev parkından gəlirdi və 19:13-də məntəqəyə çatdı. Çağırış anından taksinin gəlişinə qədər 14 dəqiqə keçdi.

19:33-də iş yoldaşımız maşına əyləşdi və aşağıdakı marşrutla yola düşdü:

Saat 19:59-da biz tələb olunan yerə çatdıq. Yolda sürücü telefonla öz maşınının satışını müzakirə edir, sərnişini söhbəti ilə narahat etmirdi və 19:59-da təyin olunmuş ünvana çatdı. Gözləməyə görə mobil tətbiqetmə özü bizi 5,61 AZN ödəməyə öhdələdi. Hər halda, 10 manatdan cəmi 4 AZN qalıq ala bildik

Beləliklə, TaxiTap proqramı vasitəsilə taksi sifarişi bizə 6 AZN-ə başa gəldi və 26 dəqiqəmizi apardı.

4. *9000 nömrəsinə zəng etdik

Bir dəfə zəng etdik, sonra yenə, sonra yenə...düz saat 19:07-ə kimi. Bu zaman, nəhayət ki, uzun çağırıdan sonra operatorun səsini eşitdik. 17 dəqiqə zəng üçün - bu dəhşətdir. Eksperiment olmasaydı, hövsələmiz ikinci dəqiqədən sonra bitəcəkdi. Operator söz verdi ki, sürücü 15 dəqiqədən sonra gələcək. Bizim avtomobilin nömrəsi ilə sms-in gəlib-gəlməyəcəyi barəsində sualımıza cavab verildi ki, sürücü özü bizimlə əlaqə saxlayacaq. Sürücü zəng vurdu. Küçəmizin nömrəsinin təzə olduğunu dəqiqləşdirmək, tıxaca düşdüyü üçün gecikəcəyini və daha 15 dəqiqədən sonra gələcəyini bildirmək üçün. Nəticədə, o, 19:27-də gəldi. Həmin vaxta bizi artıq 3 sifariş olunmuş taksi gözləyirdi. Çağırış anından taksinin gəlişinə qədər 20 dəqiqə keçdi.

Onun gəldiyini, yenə də özümüz zəng edərək öyrəndik. Sürücü bildirdi ki, supermarketin (biznes mərkəzinin) yanındadır. Amma super marketin qarşısında iki keb var idi və biz hansının məhz bizim taksi olduğunu dəqiqləşdirməli olduq. Buna rəğmən, taksiyə oturan həmkarımız “MUM-a gedirik?” sualını eşitdi. MUM-a deyil, Musabəyov parkına getdiyimizi öyrəndikdə isə sürücü təəccüblənmədi və ratsiya vasitəsilə kolleqaları ilə hansısa əcnəbi sərnişini müzakirə etməyə başladı.

Düzdü, marşrutu çox uğurlu seçdi və Statistika idarərəsinin yanındakı tıxacı məharətlə geridə qoydu:

Sürücü təyinat nöqtəsinə 19:54-də çatdı. Sayğac 5:59 AZN göstərirdi. 10 manatadan 4 manat qalıq aldıq.

Beləliklə, *9000 nömrəsi ilə çağırılmış taksi bizə 6 AZN-ə və 27 dəqiqəyə başa gəldi.

5. “Fərdi” sürücü tutduq.

Çox fikirləşmədən, beşinci işçimiz yol ayrıcına gedərək orada dayanan “şəxsi” taxi sürücüsünə yaxınlaşdı. Təyinat nöqtəsinin adını eşidcək o, 7 AZN qiymətini dedi. 6 manata aparmaqdan imtina etdi. Arxasında dayanmış Opel Astra markalı avtomobilin çürücüsü isə razılaşdı və 19:31-də “tutduğu” sərnişini maşına əyləşdirdi. Çağırışı əvəz edən axtarış və sövdələşmə 4 dəqiqə vaxt apardı.

Marşrut ideal idi:

Sürücü bizim sərnişinə “cavan ikən” həyatdan həzz almağı məsləhət görürdü və son nöqtəyə 19:55-də çatdı. Düzdür, 5 dəqiqə ərzində sonra 10 AZN-dən qalıq qaytarmaq üçün xırda axtardı.

Beləliklə, “şəxsi” taksidə səyahət bizə 6 manata və 24 dəqiqəyə başa gəldi.

 

Eksperimentin nəticələri ilə bölüşürük:

Ən ucuz taksi – 189 mobil tətbiqetmə vasitəsilə çağırılmış.

Ən sürətli – fərdi.

Çağırılma anından ən sürətli taksi – 189 xidməti.

Ən ləng taksi – *9000.

Sifariş üçün ən rahat taksi – TaxiTap.

 


Şərhlər