URBAN növbəti təcrübəsini keçirib: bu dəfə biz Bakıda avtomobil kirayəsinin nə dərəcədə rahat olduğunu yoxlamaq qərarına gəldik.

Təklifləri nəzərdən keçirib, biz avtomobillərinin sayı daha çox olan şirkətin xeyrinə seçim etdik ki, oxucularımız eksperimenti təkrar etmək istəsə, özünə heç bir məhdudiyyət qoymasınlar. Seçimimiz isə Hertz şirkətinin üzərinə düşdü.

Şirkət öz saytında bizə 24 saatlıq xidmət söz verdiyinə görə, biz iş gününün sonunda, çərşənbə günü saat 19:08-də *5995 nömrəsinə zəng vurduq və cəmi 1 günlük avtomobil sifariş elədik.

Operator dərhal cavab verdi. Əvvəlcə hansı sinif avtomobil istədiyimizlə maraqlandı, biz israfçılıq etməməkçün ekonom-sinif avtomobillə kifayətləndik. Mövcud assortimentdən bizə Nissan Sunny və Hyundai Accent təklif etdilər. Bir də maraqlandılar ki, maşın bizə şürücü ilə lazımdır, ya sürücüsüz? Məhz bu zaman 2 ayrı eksperiment keçirmək qərarına gəldik. Hələlik, birinci eksperimentimiz - sürücü ilə seçdik.

TƏCRÜBƏ №1

Sarışın qız qılığına girərək, mən sürücülü avtomobil sifariş etdim və Nissan Sunny modelini (sadəcə adı xoşuma gəldi) seçdim. Operator "nəbzi tutaraq" mənə əlavə seçimlər: uşaq oturacağı və ya beşiyi, video-qeydiyyatçı və GPS-naviqator təklif etdi. Mən belə bir assortimentə həddindən artıq sevinərək, uşaq oturacağını seçdim. Sifarişimi mürəkkəbləşdirmək məqsədilə maşını səhər saat 7:40-a çağırdım.

Operator söz verdi ki, əlaqə saxlayacaq və 5 dəqiqədən sonra dediyini yerinə yetirdi. Sürücünün gəlməli olduğu ünvanı dəqiqləşdirdi və söz verdi ki, saat 7:35-də bu qəhrəman insan mənə zəng vuracaq.

Operativlikdən özümü itirərək, ödənişi necə edəcəyim haqqında soruşdum: qabaqcadan, nağd pulla yaxud köçürmə yolu ilə. Aydın oldu ki, istədiyim kimi, yerində sürücüyə və ya köçürmə yolu ilə ödəniş apara bilərəm. Xidmətdən istifadəni bir həftəliyə və ya bir aylığa uzatmaq istəsəm, mənə güzəştli qiymətlər təqdim olunacaqdı. 

Beləliklə, Bakıda 1 günlük avtomobil icarəsinin qiyməti 50 manatdır. Əgər siz icarəni bir həftəyə qədər uzadırsınızsa, 7 gün üçün 250 AZN, bir ay üçün isə 750 AZN, yəni, günə 25 AZN ödəyirsiniz.

Sürücü xidməti bir günə 30 AZN-ə başa gəlir. Əlavə seçimlər də əlavə ödənilir. Uşaq oturacağı üçün mən 15 AZN əlavə ödəniş etməli idim. 

Səhəri gün əfsanəvi "bakı dəqiqliyi"nə arxayın olub, saat 7:35-də zəng gözləmirdim. Sürücü isə bu vaxt artıq küçədə məni gözləyirdi. Hər səhər 25-30 dəqiqə vaxtımı alan marşrutu o, cəmi 18 dəqiqəyə qət etdi. Nə deyəsən, sükan arxasında kişi olanda belə olur

Sürücü ilə keçirdiyim gün, həqiqətən də, başqa günlərdən səmərəliliyi ilə fərqləndi. Qeyd etmək lazımdır ki, o, bütün ünvanlara dəqiq vaxtında çatır, özünü son dərəcə mədəni aparırdı. Mənim isə işimi və ailə öhdəliklərimi (anamı işə aparıb-gətirmək, bacımı məktəbdən gətirmək) nəzərə alsaq, bir gündə ziyarət etdiyim ünvanların sayı az olmur. Yeri gəlmişkən, artıq ailə üzvlərinin sürücüsünə çevrilməyə ehtiyac qalmayıb. Siz öz işlərinizlə məşğul ola bilər və ya dostlarınızla əylənə bilərsiniz.

Sürücü ilə hesablaşan zaman 95 AZN-lik (50+30+15) çek aldım. Bir də ki, benzin. Səhər maşını dolu yanacaq çəni ilə qəbul edib, dolu halda da təhvil verdim.

TƏCRÜBƏ 2

İkinci varintı xatırlayıb, səhəri gün  həmkarımız sürücüsüz avtomobil sifariş vermək qərarına gəli və bu dəfə Hyundai Accent modelini seçdi.

Fərq sənədləşmədə oldu. Sürücüsüz avtomobil icarəsi zamanı salonda sizin adınıza etibarnamə tərtib edilir. Qiyməti 10 AZN-dir. Əlavə olaraq, bu dəfə biz video-qeydiyyatçı (12AZN) və GPS-naviqator (12AZN) sifarış etdik. Avtomobilin qiyməti dəyişmədi - sutkalıq 50 AZN (əgər müddət həftədən azdırsa). 

Bundan başqa, avtomobil kiraladığınız zaman siz 400 AZN-dən başlayaraq (ekonom-sinif olarsa) qoymalısınız. Lakin əgər avtomobili sığortalasanız, depozitə ehtiyac olmayacaq. Sığorta haqqı maşından asılı olaraq, 10-20 AZN arasında dəyişir.

Üstəlik, operator daha bir xidmət də təklif etdi - avtomobilin istədiyimiz yerdə təhvil verilib-alınması. Yəni ki, səhər avtomobili istədiyiniz yerdə sizə səhvil verirlər, axşam isə istədiyiniz yerdə, təbii ki, əvvəlcədən yoxlama keçirərək, sizdən təhvil alırlar.

Son iki xidmət çox əlverişlidir. Bir halda ki, siz avtomobili bir günlüyə yox, daha uzun müddətə götürürsünüz. Maşını özünüz seçmək istəyirsinizsə, Xətai metrosunun yaxınlığında - AGA Center-lə üzbəüz yerləşən salona getməli olacaqsınız.

P.S.

Günün sonunda mən avtomobil icarəsinin nə dərəcədə sərfəli olduğunu hesabladım. Nissan Sunny avtomobilinin krediti (4 illik) ayda 330 AZN, ilkin ödənişi 4110 AZN-dir. Əlbəttə deyə bilərsiniz ki, 4 ildən sonra avtomobil mənim əmlakıma çevriləcək, amma amortizasiya və Bakı yollarının vəziyyətini nəzərə alsaq, 4 ildən sonra o avtomobilin qiyməti elə ilkin ödədiyim 4 minə bərabər olacaq.

Beləliklə, 330 AZN + servis xidmətləri + avtomobil dayanacağı + yuyucu + cərimələr (səmimi olaq). Cəmi, ayda 500 manat. Deməli, avtomobilin alınması və icarəyə götürülməsi arasında fərq ayda 250 AZN təşkil edir. Bəs tıxaclarda xarab olan əsəblərimiz, dayanacaq axtarışlarında və maşına qulluq zamanı itirdiyimiz zaman nə ilə ölçüləcək? Necə deyərlər, kimə nə vacibdir. Ancaq onu bilirəm ki, Yeni İldə Şaxta Babadan mütləq şəxsi sürücülü avtomobil diləyəcəyəm.