URBAN.AZ

URBAN.AZ

Foto: Andre Jabali 

“Qarabağ” reqbi klubunun təsisçisi Eldar Kərimov bizə Bakının internat məktəblərinin uşaqları ilə reqbi oynamasından danışdı. 

Uşaq evlərində reqbi oyununun məşqlərini təşkil etmək ideyası necə və nə zaman yarandı?

Uşaq evlərində məşqlərin təşkili “Qarabağ” reqbi klubunun yetişdirməsi, özü də uşaq evindən olan  Nəzər Cəfərovun  “Tsikara”gürcü klubunun  məşqçilərinin nəzərini cəlb etməsi və  onun Gürcü klubuna dəvətindən sonra başladı. Bundan başqa, böyüklər üzrə yığmanın böyük əksəriyyətini məhz uşaq evlərindən olanlar təşkil edir ki, onları da uşaq yaşlarından azərbaycanın bacarıqlı məşqçisi, mənim müəllimim  Vaqif Səadətxan hazırlaşdırmışdır. Bu bizi ruhlandırdı və biz ağsaqqalın işini daha böyük miqyasda davam etdirmək qərarına gəldik. Məşqlər bu ilin fevralından başlamışdır.

Reqbi komanda oyunudur. Burada idman növündə  oyunçuların ayrı-ayrılıqda bacarıqları böyük rol oynasa da, nəticə etibarilə isə oyunçuların komandada birləşmə bacarığı sayəsində uğur qazanılır. Elə bu səbəbdən də uşaq evlərindən olan yeniyetmələr daima birlikdə vaxt keçirdiklərinə görə bu oyun üçün hazır kollektiv hesab olunurlar.

Şübhəsiz ki, bu uşaqlara diqqət göstərmək vacibdir. Biz onlar üçün idmanla məşğul olmağa və peşəkar idmançı karyerası qurmağa  şərait yaradırıq. Əlbəttə, onların hamısı peşəkar idmançı olmayacaq, ancaq onlar uşaq yaşlarından idmanla məşğul olmaqla sağlam həyat tərzinə öyrəşəcəklər ki, bu da hal-hazırki cəmiyyətimiz üçün çox vacib məqamlardandır. Layihəmizin də əsasında məhz bu məqsəd durur.

Layihə hansı müəssisələri əhatə edib və bütünlükdə neçə uşaq bu işə cəlb olunub?

Bugünkü gündə “Qarabağ” RK-unun məşqləri Bilgəh qəsəbəsində yerləşən 11 saylı inteqrativ tipli internat məktəbində aparılır. “Pələng” RK –nun məşqçisi Vaqif Səadətxan isə layihə çərçivəsində oğlanları 3 saylı uşaq evində məşq etdirir. Ümumilikdə, bu iki müəssisədə 60-dan çox uşaq məşqlərə cəlb olunub.  

Həmçinin biz aidiyyatı olan qurumların icazəsilə iyul ayından bu layihəyə Buzovnada yerləşən 8 saylı internat məktəbin, Mərdəkanda yerləşən 1 saylı internatın və Türkanda yerləşən internat-məktəbin  uşaqlarını da cəlb etməyi düşünürük. Bununla da, məşqlərə cəlb olunan uşaqların sayı 120-ni ötəcək.

Hər şey necə başladı? Uşaqlar bunu necə qəbul etdilər?

Uşaqlar onlar üçün yeni olan bu idman növünün məşqlərini böyük maraqla qarşıladılar. Məşqöncəsi təqdimatlardan bəlli olurdu ki, onlar bu idman növündən bixəbərdirlər. Buna baxmayaraq, oval formalı top və oyunun elementləri onların o qədər xoşlarına gəldi ki, yorğun olmalarına baxmayaraq, onlar məşqin bitməsini istəmirdilər. Hər məşqi uşaqlar böyük səbrsizliklə gözləyirlər, bu isə biz məşqçilər üçün qiymətsizdir.

Proses zamanı uşaqların hansı münasibətləri ilə qarşılaşdız? Ünsiyyətdə olmaq istəyi, ürəyini açmaq, dost olmaq, bəlkə aqressiya?

Hər bir kollektivdə olduğu kimi, bizim klubda da uşaqların xarakterləri müxtəlifdir. Elə uşaqlar var ki, elə ilk məşqdən özlərini çox intizamlı və məqsədyönlü göstərdilər. Əvvəllər cığallıq edib məşqlərə vaxtlı-vaxtında gəlməyənlər də az deyildi. Lakin onların yaşını və oyunun onlar üçün tanış olmamasını nəzərə alaraq ilk məşqləri yarış formatında keçirirdik.

Bu və ya digər məşq tapşırığının düzgün yerinə yetirilməsi  zamanı rəğbətləndirmə və tərif üsulları işə yarayır. Uşaqlarda öz güclərinə inam yaranır, bu isə oğlan uşaqlarının fiziki tərbiyəsi zamanı vacib məqamlardandır. Sözsüz ki, bu uşaqlar bizi təkcə məşqçi kimi deyil, dost kimi görmək istəyirlər. Biz də onların dostu olamağa çalışırıq.

Məşq vaxtı gəldikdə onların hazır vəziyyətdə, gözlərində qığılcımla məni darvazda qarşılamaları  sözlə ifadə olunmayan hisslərdəndir. Uşaqlar qabağımıza qaçır, salam vermək üçün əsl kişi kimi əl uzadırlar. Və əlbəttə, hər  məşqdə beynəlxalq turnirlər keçirilərsə, bu turnirlərdə Azərbaycanın bayrağını kimin aparacağı müzakirə olunur.

Məşqlərdən birində uşaqlardan hansısa intizamı pozdu. Bunu kimin etdiyini soruşanda heç kim dillənmədi. Məşq bitdikdən sonra uşaqların soyunub-geyinmə otağına daxil oldum və gördüm ki, onlar günahkarı sakitcə tənbeh edir, hərəkətlərini pisləyirlər. Bu hadisə mənə həqiqətən təsir etdi. Bu bir-birinə bağlanan, kömək etmək istəyən uşaqların timsalında gözəl bir nümunədir. Təbii ki, bu işdə 11 saylı internat-məktəbin direktoru Gülnarə xanımın rolu əvəzsizdir. Ona dərin minnətdarlığımı bildirirəm.

Layihə indi hansı mərhələdədir?

İlkin mərhələni demək olar ki, arxada qoymuşuq.Məşqlərdən bir neçə ay sonra komandalar arasında Ümumimilli lider Heydər Əliyevin xatirəsinə həsr olunmuş yoldaşlıq görüşü keçirildi. Bu görüşdə 3 saylı internatın təcrübəli oyunçuları qalib gəldi. Görüşün sonunda onlara diplomlar təqdim olundu. 

Layihəmizə daha 3 internat qoşulduqdan sonra məşqlərin  nəticələrinə əsasən  payızda 5 internat komandası arasında  reqbi üzrə ilk Bakı turniri keçiriləcək.

Uşaqlar arasında ümid vəd edənləri varmı? 

 Bu iki komandada həqiqətən yaxşı reqbi oyunçusu ola biləcək uşaqlar çoxdur. Hər bir uşaq individual olaraq inkişaf edir. Eləsi var ki, hərəkəti göstərən kimi, havada tutur. Elələri də var ki, onlarla günlərlə məşq etməli olursan. Elə tip uşaqlar da var ki, onlardan uzun müddət heç bir nəticə görmürük, lakin birdən-birə bu uşaqlar sahədə elə oynayırlar ki, özümüz də mat qalırıq. Elə bu səbəbdən də hər bir uşağa fərdi yanaşmaq lazımdır.

12 yaşlı Oqtayı misal göstərmək istərdim. İlk məşqlərdən Oqtay 14-15 yaşlı oğlanlarda döyüşə girir. “Heç özündən böyük oğlanlardan qorxmursan?” sualına Oqtay zarafatyana: “Lazım gəlsə, sizinlə də döyüşərəm”, -  cavabını vermişdi.

15 yaşlı Muhəmməd isə reqbiyə olan məhəbbətini bu oyunun həm komanda oyunu olması, həm fərdi olması, burada eyni zamanda gücün, cəldliyin və cəsarətin vəhdətinin olması ilə izah edir. Indi o eyni zamanda topla oynayaraq güləş elementlərini də göstərə bilir.

Sizə nə cür dəstək lazımdır və layihəni necə davam etdirməyi düşünürsünüz?

EPUL şirkəti bizə bu layihəni reallaşdırmağa kömək edir. Fürsətdən istifadə edib şirkət rəhbərliyinədərin minnətdarlığımı bildirirəm. Lakin layihə bitməməlidir. Biz “Qarabağ” klubunun fəaliyyətini tam bərpa edib, əsasında internat uşaqlarının olduğu müxtəlif yaş kateqoriyalı heyət yığmaq istəyirik.

“Qarabağ” RK-nun ilkin məqsədi ölkədə güclü reqbi məktəbinin yaradılması, daha sonra isə postsovet ölkələrində bu layihələrin davam etdirilməsi olmuşdur. Bu ata-anadan məhrum olmuş uşaqlara yarışlar çərçivəsində Avropanı gəzmək üçün əla fürsət olacaq. Onlar yarışlarda qalib gələcək, vətənimizin bayrağını ucalara qaldıracaqlar. Onlarda, şübhəsiz, bu potensial var.

Klubu yaradarkən biz heç bir maddi gəliri göz önündə tutmamışıq. Bu, bizim üçün hobbidir. Lakin bu hobbini biz peşəkarcasına inkişaf etdirmək istəyirik. Bu işi inkişaf etdirmək üçün isə bizə dəstək lazımdır. Hər şeydən əvvəl, kluba oyunçuları hazırlamaq üçün stadion lazımdır. Bu bizim əsas problemimizdir. Bizə bu problemi həll etməkdə kömək etsələr, qalanı düzələcək.

Biz ümid  edirik ki, Azərbaycanda reqbinin inkişafına dəstək olan, bununla da uşaq evləri və internatlarda olan uşaqların həyatını yaxşıya doğru dəyişməyinə kömək edəcək insanlar tapılacaq.

Əlaqə üçün "Qarabağ” RK: +99455 276 01 68

Sosial şəbəkələr vasitəsilə: Instagram и Facebook

 

Şərhlər