Tap.az, arenda.az, bina.az və digər saytlarda mənzillərin kirayə verilməsi ilə bağlı elanlara baxsaq, ev sahiblərinin öz evini ya gənc ailəyə ya uzaq başı iki qıza kirayə vermək istədiyini görərik. Bəs tək yaşamaq istəyənlər necə olsun? Biz tənha qızın Bakıda mənzil kirayələməsi asan və ya çətindir sualına cavab axtarırıq.

Mənzil kirayələmənin bir neçə üsulu var: xüsusi saytlarda elan axtarmaqla, maklerə müraciət etməklə, müxtəlif qruplar elan yerləşdirməklə, dost-tanışdan soruşmaqla və s. Apardığımız təcrübənin düzgün olması üçün biz ilk üç üsuldan istifadə etdik (dost-tanış vasitəsilə kirayə çıxdıqda adətən problem yaranmır). Qeyd edək ki, birinci üsul bəzən ikinci üsulla eyni olur. Belə ki, elan saytında verilən elanların əksəriyyəti hər bir kirayə veriiyi mənzilin dəyərindən birinci ay 20-30 faiz qazanc edən maklerlərə məxsus olur.

1-ci üsul

Saytlarda kirayə verilən bir otaqlı mənzil ilə bağlı elan axtarırıq. Bir neçə nömrəyə zəng edib öyrənirik ki, mənzil sahibləri öz mənzillini yalnız ailəyə və ya birlikdə yaşayacaq tələbə qızlardan başqa heç kəsə vermir. Zənglərimizə məhz bu cavabı versələr də, redaksiya heyətimiz axtarışı davam etdirir. 

Beşinci zəngimiz bizə ümid verir! Telefonun dəstəyindən gələn kişi səsi bizə “Xətai” rayonunda yerləşən məzillərinin birinin gələcək sakininin adını soruşur.

Dialoqumuz aşağıdakı kimi olur:

- Xanım, siz tək yoxsa rəfiqənizlə yaşayacaqsınız?

- Tək.

- Bəs nə üçün indi yaşadığınız mənzildə yaşamaq istəmirsiniz?

- Mən iş yerimə daha yaxın mənzil lazımdır.

- Xanım, evlisinizmi?

- Xeyr, o zaman mən ərimlə birlikdə kirayə çıxardım.

- Ailə qurmaq istəyirsinizmi?

Və biz bu söhbətə son qoyuruq. 

Digər bir ev sahibini gələcək kirayənişininin yaşı, maddi vəziyyəti, işi (mənzil sahibi üçün normaldır) və ailə üzvlərinin sayı düşündürür. Ötən əsrdə qalan rəsmiliyi kənara tullayaraq o, gələcək kirayənişininə “sən” deyə müraciət edir.

- Neçə yaşın var?

- 23.

- Atan-anan varmı?

- Təbii.

- Valideynlərin Bakıda yaşayır?

- Bəli.

- Bəs sən harada yaşayırsan?

- Bakıda.

- Niyə kirayə çıxırsan?

- Öz işimə yaxın yaşamaq istəyirəm.

- Mənzildə neçə nəfər yaşayacaq? Atan-anan da səninlə yaşayacaq?

- Xeyr, mən tək yaşayacam.

- Mən bu cür kirayə vermirəm.

Maraqlı bir dialoq yarandığı üçün metronun "İnşaatçılar" stansiyasının yaxınlığındakı kiçik birotaqlı mənzilin sahibindən niyə yaşayış sahəsini kirayəyə yalnız birlikdə ysaşayanlara verdiyini öyrənməyə qərar veririk.

"Mənə əlavə problemlər lazım deyil. Bir qız valideynlərinin evindən köçüb tək yaşamaq istəyirsə, ondan nə gözlənilə bilər? Belə olarsa, o nəzarətsiz qalar. Bəs kənardan baxan, bəs qonşular nə deyər? Mən mənzilimdə pis bir şeyin baş verməsini istəmirəm. Tək yaşayan qıza pis baxırlar".

Növbəti zəngimiz uğurlu olur. Belə ki, mənzilin sahibi gələcək kirayənişinin iş yeri və kirayə yaşayacaq müddəti ilə maraqlanır. Odur ki, kirayə mənzil axtarışında olanda artıq telefon danışığı mərhələsində sizə çoxlu sual veriləcəyinə hazır olun. Yeddinci cəhddə bəlkə mənzil kirayə götürə bilərsiniz.

2-ci üsul

Hər bir müsbət cavab qarşılığında üç rədd cavabı aldığımız saytlarda şansımızı sınadıqdan sonra biz maklerlərə müraciət edirik. Yuxarıda qeyd edildiyi kimi, adətən bu peşənin nümayəndələri göstərdiyi xidmət müqabilində ilk ayın ödənişinin 20-30 faizini tələb edir. Bu məbləğə kirayə mənzilin tapılması və həmin mənzilin sahibi ilə danışıqların aparılması daxildir. Bizə dərhal bir neçə mənzil təklif edən maklerə müraciət edirik. Burada da müxtəlif yanaşmalar var. Məs., mərkəzdə bir mənzil kirayələmək istəsəniz, maklerlər sizə israrla mərkəzdən kənarda mənzil təklif edə bilər. Yəni bir çox maklerlər sizin istəyinizi deyil, öz qazancını nəzərə alır.

Qeyd edək ki, tənha qızın makler vasitəsilə kirayə mənzil tapması ehtimalı həmin qızın elan vasitəsilə kirayə mənzil tapması ehtimalından daha çoxdur. Belə ki, adətən maklerdə kirayə verilən mənzillər haqqında məlumat olur.

3-cü üsul

Sonuncu üsul sosial şəbəkələrdəki qadın qruplarında elan yerləşdirməkdir. Bizim Facebook-dakı elanımıza bir neçə ev sahibəsi şərh yazır. Uyğun bir mənzil seçirik və dərhal qızın tək yaşayacağını bildiririk. Cavabı belə olur:

"Mən heç kəsin şəxsi həyatına qarışmıram. Məni kimin nə işlə məşğul olması maraqlandırmır. Əsası odur ki, mənzildə səliqə-səhman olsun".

Beləliklə, kifayət qədər səy göstərsəniz və bir neçə gün fəal axtarış aparsanız, həmçinin qruplarda da uyğun mənzil tapa bilərsiniz.

Nəticə

Mənzil sahiblərinin ehtiyat etməsi anlaşılandır. Belə ki, davranışı qonşuların narazılığına səbəb ola biləcək vicdansız kirayəçilərə rast gəlmə ehtimalı həmişə mövcuddur. Lakin ev sahiblərinin tək yaşayan qızın yaşadığı yerdə əxlaqsızlıqla məşğul olacağına dair əminliyinin hələ də mövcud olmasını anlamaq olmur.

Hətta tənha qıza öz mənzilini kirayə verməyə razı olanlar belə qeyd edir ki, kirayənişin hər işlə məşğul ola bilər, lakin qonşular bunu bilməməlidir.

Belə çıxır ki, öz adının ləkələnməməsi üçün təmiz qız qocalanadək öz valideynləri ilə birlikdə yaşamalıdır. Kirayə çıxmaq istədikdə isə, öz hərəkətlərinə nəzarət etdirmək üçün o, onunla bir mənzildə yaşayacaq otaq yoldaşı tapmalıdır. Kirayə mənzil axtarmağın səbəblərinin müxtəlif olması haqqında söhbət belə gedə getmir (iş yerinə daha yaxın yaşamaq, müstəqil həyat qurmağa çalışmaq, maddi cəhətdən valideynlərdən asılı olmamaq). Həmçinin mənzili kirayə götürmək istəyərkən qızın valideynləri haqqında məlumat/qızın valideynlərinin imzaladığı razılıq ərizəsi və ya mənzilin sahibiylə şəxsən danışması üçün qızın valideynlərinin və ya qohum-əqrəbasının gəlməsi zəruriliyinin səbəbi də aydın deyil. Qanunvericilikdə göstərilir ki, yaşı 18-i keçmiş şəxslər yetkin sayılır və öz hərəkətlərinin cavabdehliyini daşıyır.

Xoşbəxtlikdən təcrübəmiz göstərdi ki, yuxarıda qeyd edilən düşüncələr heç də hər kirayə mənzil sahibinə aid deyil. Lakin mənzil kirayə verərkən əksər hallarda üstünlüyün ailələrə və ya birlikdə yaşayan iki qıza verilməsi faktı kədərləndiricidir.

Mənzil kirayələmək istəyən tənha oğlanlar və evli olmadan birlikdə yaşayan cütlüklər (vətəndaş nigahı) daha böyük çətinliklərlə üzləşir. Bu isə ayrıca söhbətdir ...