Yanvar ayının 7-də dünya şöhrətli hindistanlı quru Şri Şri Ravi Şankar Bakıya təşrif buyurub.​

Humanitar lider, ruhani rəhbər və sülh səfiri Şri Şri Ravi Şankar “Art of Living” beynəlxalq təşkilatının yaradıcısıdır. Bütün dünyada milyonlarla insan onun stresdən və zorakılıqdan uzaq bir cəmiyyət qurmaq arzusundan ilhamlanıb.

Şri Şri Ravi Şankarla Bakıda ilk görüş DTX-nın Mədəniyyət Mərkəzində baş tutub.

Qurunun Azərbaycana gəlişi gözlənilməz hədiyyə olub. Belə ki, qonaqların qeydiyyatı üçün cəmi 1 gün vaxt qalmasına baxmayaraq, 300-ü başqa ölkələrdən gələn qonaqlar da daxil olmaqla, 1200-dən çox insan görüş üçün qeydiyyatdan keçməyə müvəffəq olub. 

Görüşə birbaşa hava limanından gələn Ravi Şankar axşam saat 22.00-a qədər ziyarətçilərlə söhbət edib, çoxsaylı sualları cavablandırıb və tədbirin sonunda meditasiya edib.

Şri Şri Ravi Şankarla ikinci görüş Sea Breeze-dəki “Nine Senses Art Center”-də baş tutub. Bu görüşü yüzdən artıq ziyarətçi ziyarət edib. ​

Guruci ilə görüş sual-cavabla başlayıb. O, ziyarətçilərə bildirib ki, hər bir insan üçün əsas enerji və sakit zehin mənbəyi onun nəfəsidir. Bütün dünyada Art of Living təşkilatının minlərlə müəllimi unikal nəfəs təcrübələrini tədris etməkdədir. “Aşiq olanda və sevinəndə ağlınız indiki anda olur. Məhz o zaman yoqaya nail olursunuz. Yaşamaq sənəti indiki anda yaşamaqdır" – deyə quru əminliklə bəyan edib.

O, ziyarətçilərlə söhbətləşib, İnsan həyatı, fəlsəfəsi, ruhani yolu ilə bağlı sualları cavablandırıb, və əlbəttə ki, öz təcrübəsini, sevgisini “Nine Senses”in qonaqları ilə bölüşüb.

Qurudev bildirib ki, Bakı dünyanın ən xoşbəxt şəhəri olması üçün böyük potensiala malikdir. O, ölkəmizin ruhani mədəniyyətinin daha çox inkişaf etməsi üçün əlindən gələni edəcəyinə söz verib.

Yola düşməzdən əvvəl Şri Şri Ravi Şankar bu ilin noyabrında BMT-nin iqlim dəyişikliyi ilə bağlı keçiriləcək The Conference of the Parties üçün Bakıya qayıdacağına söz verib. O, bu altı ay ərzində Bakıda nəfəs texnikasını mənimsəyənlərin və yoqa müəllimlərinin sayının daha da artacağına ümidvar olduğunu bildirib.

Şri Şri Ravi Şankar təkcə meditasiya müəllimi deyil, həm də “Biznesdə Etika naminə” beynəlxalq forumunun təsisçisi və Padma Vibhuşan ordeninin sahibidir. 2009-cu ildə Forbes India tərəfindən Hindistanın ən güclü 7 adamı siyahısında 5-ci yerdə qərarlaşıb.

O, 1981-ci ildə Art of Living qeyri-kommersiya təhsil və humanitar təşkilatını təsis edib. Onun proqramları zehni stresdən azad etməyə imkan verən unikal nəfəs texnikaları üzərində qurulub. Təşkilatın mövcud olduğu 42 il ərzində 150-dən çox ölkədən 450 milyon insan onun kurslarını keçib.

"Art of Living" təşkilatının Bakıdakı əlaqə nömrəsi: +99470 655 99 22