Asteklər dünyaya təkcə təqvimlərini, kartofu və qarğıdalını bəxş etməyiblər.

Kortes isə Avropaya təkcə onların qızılını gətirməyib. Dünya üçün ən dadlı icad kakao ilə bağlıdır. Bu toxumlar  insanlara ən ləzzətli anları bəxş edir. İlk zamanlar onu yalnız duru halda hazırlaya bilirdilər. Yalnız 19-cu əsrin sonlarında şokoladı bərk formaya salma üsulu kəşf olundu.

Şokolad təkcə sevimli şirniyyat deyil, həm də elm və sənətdir. Yeni sənət meydana çıxdı- şokolatye. Məhz şokolatye bizim tanıdığımız məhsulun təkrarolunmaz və qeyri-adi dadlarını yaradır.

Dünyaynın bir çox şəhərlərində bu dadlı məhsula həsr olunmuş festivallar keçirilir. Belə dad bayramları həftələrlə davam edə bilir. Məşhur Turin şəhərində olduğu kimi.

2003-cü ildən başlayaraq Turində hər il «CioccolaTo» adı altında şokolad festivalı keçirilir. 10 gün ərzində burada tonlarla şokolad hazırlanır və yeyilir. Ziyarətçilər şokoladın hazırlanma prosesinə tamaşa edə, həm də bu prosesdə iştirak edə bilərlər.