Uşaq hüquqları konvensiyasını qəbul edilməsinin 25-illiyi münasibətilə UNİSEF Beynəlxalq uşaq fondu #IMAGINE (“Təsəvvür edin!”) layihəsinə başlayır. Hər bir şəxs Con Lennonun əfsanəvi mahnısının öz versiyasını yazdıra bilər. Bunun üçün layihənin səhifəsindən və ya Apple App Store vasitəsilə TouchCast əlavəsini yükləmək lazımdır. Sonra isə siz qırmızı düyməyə basıb mahnını oxumalısınız. Həmçinin, uşaqlar üçün ideal dünyanı necə gördüyünüz haqda şəxsi müraciət yazıb #EVERYVOICECOUNTS və #IMAGINE xeşteqləri ilə bölüşməlisiniz.

Mahnının bütün variantları sonradan məşhur DJ Devid Getta tərəfində tək mahnı halında birləşdiriləcək. Mahnının yeni versiyası və klipi yeni il qabağı işıq üzü görəcək.

#IMAGINE kampaniyasında yığılmış bütün vəsait dünyanın 150-dən artıq ölkəsində uşaqların təhsili, qidalanması, sağlamlığının qorunması və immunizasiyası, həmçinin, fövqəladə şəraitdə onların təmiz su və sanitar şəraitlə təmin olunmasına sərf olunacaq.