Çelentanonun tamaşaçıları xarizması, yoxsa istedadı ilə fəth etdiyini demək çətindir. Düşünürəm ki, bu xüsusiyyətlərin hər ikisini özündə cəmləməsi ona təkrarolunmaz və yaddaqalan obraz yaratmaq imkanı vermişdir.

Adriano Milan yaxınlığında kasıb kəndli ailəsində dünyaya gəlmişdi. 12 yaşında ailəsinə yardım etmək üçün məktəbi ataraq, saatsazın şagirdi kimi çalışmağa başlamışdır. Elə o zamandan o, musiqi ilə maraqlanmağa başlamışdır. Həvəskar tamaşaların birində tanınmış müğənnini elə yaxşı təqlid edir ki, onu bir neçə istedad yarışmasına dəvət edirlər. Rok-n-rolla maraqlandığı üçün o, tez-tez Elvis Prestli və Cerri Li Lyuisi yamsılayırdı. Səhnədə hərəkət etmək qabiliyyətinə görə Adriano "Mollegiato" - "yaydan asılmış" ləqəbini qazanmışdı.

O, dəfələrlə San-Remo müsabiqəsinin qalibi olmuş, onun mahnıları isə İtaliya və bütün Avropanın xit-paradlarını fəth etmişdir.

60-cı illərdən başlayaraq, Çelentano filmlərə çəkilməyə başlayır. Kinodakı ilk böyük rolu "Serafino" filmində olur. O vaxtdan müğənni tez-tez çəkilməyə başlayır. İşləri arasında - "Kələk", "Dəlicəsinə aşıq", "İnadkarın ram edilməsi" , "Binqo-Bonqo" və başqaları var.

80-ci illərdən başlayaraq, o, özünü aparıcı kimi də sınamağa başlayır. 90-cı illərdə isə kino işindən imtina edərək, diqqətini musiqiyə cəmləyir və bizə neçə unudulmaz xit bəxş edir.