İyun ayının 30-u, Art Villa qalereyasında Rəsul Həsənovun foto-illüstrasiya üslubunda "Düha" adlı portretlər sərgisi keçiriləcək.

Sərginin "Düha" adlandırılması tariximizdə mühüm rol oynamış dahi şəxslərin portretlərinin yer alması ilə bağlıdır. Sərgidə portretlərlə yanaşı obrazlar da nümayiş etdiriləcək. Portretlər və obrazlar arasında Hüseyn Cavid, Mikayıl Müşfiq, Fətəli Xan Xoyski, Vaqif Mustafazadə, Üzeyir Hacıbəyov, Abbasqulu ağa Bakıxanov, Xurşidbanu Natavan, Lev Tolstoy, Frank Sinatra və s. kimi dünya tarixində böyük rol oynamış şəxslər yer alacaq.
Qrafik dizayner və illüstrator Rəsul Həsənov 1991-ci ildə Bakı şəhərində anadan olmuşdur. 2013-cü ildə Azərbaycan Dövlət İqtisad Universitetinin "Texnologiya və Dizayn" fakultəsini bitirmişdir. 2004-cü ildən dizayn sahəsində çalışmağa başlamışdır. Portretlər silsiləsinin yaranma tarixi isə üç il əvvələ söykənir. Fotorealistik üslubda hazırlanan portretlər həmin şəxsləri yenidən canlandırmağa, tədricən unudulmuş keçmişi yenidən oyatmağa yönəldilmişdir.

ArtsCounsil Azerbaijan tərəfindən keçiriləcək sərgi iki gün müddətində davam edəcək. Sərginin kuratoru Fəridə Qarayeva.

Rəsmi açılış 30 iyun, saat 19:00. Giriş sərbəstdir.

Ünvan: Bakı şəhəri, Həsən Seyidbəyli, 1
Əlaqə: 070 819 79 82