Baku Book Center-in yalnız mağaza olmadığını bilirdinizmi? Burada istənilən kitabı rahatcasına kresloda və ya kafedə oturub oxumaq olar.

Bu Kitab mərkəzində həmçinin oxu zalı, görmə qabiliyyəti zəif olanlar üçün guşə, uşaq guşəsi, müxtəlif ədəbi və  mədəni tədbirlərin keçirildiyi məkan və təhsil məkanı da var. Baku Book Center şəhər sakinlərinin və şəhərimizin qonaqlarının ən çox sevdiyi məkanlardan birinə çevrilmişdir. Biz buraya kitabsevərlərimizin nə oxuduğunu öyrənməyə gəlmişik.

Şəkil: Ruslan Sonin 

Nigar

Baku Book Center-ə bu gün mən kitab oxumağa gəlmişəm. Seçimim Şarlotta Brontenin "Ceyn Eyr" əsəri oldu. Əvvəllər mən bu müəllifin yaradıcılığı ilə tanış deyildim, lakin bu kitabın nə üçün bu qədər məşhur olması məni maraqlandırırdı. Bu kitabın içindəkilər həyəcan doğururmaya bilməz. Əsərin süjeti çətin həyat sürən və ilk baxışdan sadə görünən qulluqçu qızla mister Roçesterin qarşılıqlı məhəbbəti üzərində qurulub. Çətinliklərə baxmayaraq, qızın məhəbbəti onu xoşbəxtlik uğrunda mübarizədə qalib edir. Hələlik kitabı sonadək oxumamışam.

Nuranə

Mən David İqlmanın "Beyin: Senin Hikayen" ("Beyin. Sizin şəxsi hekayəniz") kitabını oxuyuram. Müəllif – neyrobiologiya ilə məşğul olan Amerikalıdır. Mən bu kitabın türk dilinə tərcüməsini oxuyuram. Kitabda hər kəsə aid olan suallar qoyulur: Biz kimik? Nə üçün bizə digər insanlar lazımdır? Gələcəkdə bizi nə gözləyir? Sizə bu kitabı oxumağı tövsiyə edirəm.

İlgiyyə

Baku Book Center-ə mən kitab oxumaq üçün gəlmişəm. Hassan Haminin ingilis dilində yazdığı "Twisting Toward the Rolling Stones" əsərini oxuyuram. Çox rahat oxunan bu kitab maraqlı üslubda yazılıb. Qeyd edim ki, müəllifin bir çox əsərində personajlar Mərakeş, Böyük Britaniya, ABŞ, Moldova və Azərbaycan kimi müxtəlif mədəniyyət və sivilizasiyaya mənsub adamlardan ilhamlanır.

Kamilə

Alman dilində ədəbiyyat oxumağı xoşlayıram. Alman məktəbini bitirmişəm. Hazırda tibb universitetinin tələbəsiyəm, gələcəkdə isə təhsilimi Almaniyada davam etdirmək niyyətindəyəm. Məhz buna görə də mən tibb ədəbiyyatını alman dilində oxumağa üstünlük verirəm. Boş vaxtlarımda bədii ədəbiyyat, çox zaman roman oxumağı xoşlayıram. Bu gün mən avstriyalı yazıçının "Blasmusikpop" əsərini oxuyuram.

Aleksandra

İnkişafetdirici kitabları oxumağı sevirəm. Lakin hər zaman yalnız bu kitabları oxumaq mümkün deyil. Buraya bədii əsər, roman oxumaq üçün gəlmişəm. Seçimim iki müəllif arasında olacaq: Paulo Koelyo və Xaruki Murakami. Koelyonun yaradıcılığı ilə tanış deyiləm, amma Murakaminin üslubunu çox bəyənirəm. Güman edirəm ki, onun əsərlərindən birini oxuyacam.

Ayşən

Buraya gəlməkdə məqsədim Sara Cionun "Sonuncu kameliya" adlı əsərini oxumaqdır. Mənim xoşum tarixi romanlardan gəlir. Bu kitab 1940-cı illərdə cərəyan edən hadisələrdən söhbət açır. Əsərin baş qəhrəmanı nadir kameliya növünü tapmaq üçün varlı evdə dayəlik etməyə məcbur olan Flora Lyuisdir. Daha sona müəllif bizi indiki dövrə gətirir. Burada biz Nyu-Yorkda yaşayan Sinkler ailəsilə tanış oluruq. Əlbəttə ki, bütün bu əhvalatlar incə kameliya ilə bağlıdır.

Nailə

Əvvəllər mən klassik əsərləri çox sevirdim. İndisə mən Lyudmila Ulitskaya, Dina Rubina, Qriqori Kanoviç və bir çox başqa rus yazıçılarının əsərlərini oxuyuram. Ən sevdiyim kitab Alexandra Bruşteynin "Yol uzağa gedir" ("Дорога уходит вдаль") kitabıdır. Onu hər kəsə tövsiyə edirəm. Həmin kitab gənc nəslin tərbiyəsi üçün mükəmməldir.

Anna

Bakıya Moskvadan gəlmişəm. Baku Book Center-ə rəfiqəmin tövsiyəsilə gəldim. Burada məni cəlb edən çoxlu sayda maraqlı kitablar var. Buraya yalnız on dəqiqəlik girməyi düşünürdüm, amma burada olduğumuz müddət artıq bir saatdan çoxdur. Stefan L. Petranekin "Marsda necə yaşayacağıq?" ("Как мы будем жить на Марсе?") əsərindən çox xoşum gəldi.

Bu iki gənclə biz Nik Vuyniçin "Sərhədsiz məhəbbət" ("Любовь без границ") əsərini müzakirə etdik. Kitabın müəllifi əlsiz və ayaqsız doğulduğundan heç bir qadının onu sevə bilməyəcəyini düşünürmüş. O, özünün yaxşı həyat yoldaşı ola biləcəyinə şübhə edir. Hətta onun yaxınları da onun kimi düşünür. Lakin sonda o, öz məhəbbətini tapa bilir. Bu kitabın hər bir fəsli məhəbbət axtarışının müəyyən bir cəhətinə həsr olunur: münasibətlərin yaranması, məhəbbətə doğru addımların atılması, toy və ailənin qurulması. Bu heyrətamiz cütlüyün tövsiyələri öz məhəbbətini axtarana da, artıq öz məhəbbətini tapana da faydalıdır.

Murad

Buraya Deyl Karneqinin "Narahatlığa necə son qoymalı və rahat yaşamalı" ("Как перестать беспокоиться и начать жить") kitabını oxumağa gəldim. Bu kitab artıq bestseller olub. O, insanın fəal həyat, uğur və xoşbəxtlikdən həzz almasını əngəlləyən hər şeydən azad olmasına köməklik edir.

Bu gözəl xanım bizə ədəbiyyatda verdiyi üstünlüklərdən danışdı.  O, romantik məhəbbət romanlarını deyil, psixologiya və tarix kitablarını sevir. Tarixi şəxsiyyətlər haqqında kitabların oxunması onun maraq dairəsindədir. Məs., nə üçün Hitleri humanistlik və mərhəmət deyil, irqinin təmizliyi maraqlandırırdı. Hər bir şəxsiyyəti təhlil etdikdə müxtəlif məsələləri anlamaq üçün müxtəlif elm sahələrindən istifadə olunur.

Baku Book Center-də o, İran yazıçısı Parinouş Saninin yazdığı "Mənim payım" kitabını oxuyur.

Əli

Tez-tez dostlarımın mənə məsləhət verdiyi kitabları oxuyuram. İndi Samid Ağayevin "Bakıdan sevgilə" ("Из Баку с любовью") kitabını oxuyuram. Romandakılar iki zaman kəsiyində cərəyan edir: 80-ci illərdə Moskvada və 1918-ci ildə Bakıda. Leninqrad bazarında gənc bir qız gənc bir oğlana maraq göstərir. Bu gənclər tanışlıqdan sonra görüşə çıxırlar, daha sonra isə oğlan qızın evində qonaq olur. Divardan qonağa çox bənzəyən bir imperator ordusu zabitinin portreti asılmışdır. Portretdəki bu şəxs inqilabi Bakıda azərbaycanlıların qırğını zamanı Anastasiyanın nənəsini xilas etmişdir. Anastasiyanın mənzilində gecələyən gənc oğlan tamamilə başqa yerdə və başqa zamanda oyanır. Kitab çox maraqlıdır. Onu oxumağınızı tövsiyə edirəm.

Biz, həmçinin Baku Book Center-in əməkdaşları ilə də söhbət etdik. Onlar kitab oxumağı çox sevdiklərini bildirdi.

Orxan

Bu an mən ən çox sevdiyim yazıçının, yəni Əhməd Cavadın əsərlərindən birini oxuyuram. O, milli himnimizin sözlərini yazan dahidir. Onun əsərlərində yumora böyük önəm verilir. Həmçinin mən elmi, tarixi və bədii ədəbiyyat oxumağı sevirəm. Azərbaycan yazıçılarına üstünlük verirəm. İncəsənətə öz töhfəsini verən müasir Azərbaycan müəlliflərinin dəstəklənməsinin tərəfdarıyam. Baku Book Center-in tarixi və dini ədəbiyyat şöbəsində çalışıram.

Sevinc

Baku Book Center-də çalışmağımın əsas səbəbi kitab oxumağı çox sevməyimdir.  Ən çox sevdiyim müəlliflər German Hesse və Tomas Manndır. Ədəbiyyata olan sevgi mənə hələ məktəb dövründə müəllimim tərəfindən aşılanmışdır. O, mənə çoxlu kitab oxumağı məsləhət görürdü. Düşünürəm ki, əsl kitab sevgisini mən Şekspirin "Hamletini" oxuduqdan sonra duydum.

Məhəmməd

Mən kitab oxumağı sevirəm. Kitab oxuduqda heç bir xüsusi janra fərq qoymuram. Klassik əsərlərə üstünlük versəm də, müasir ədəbiyyatı da izləyirəm. Çox zaman realizm üslublu kitabları oxuyuram. Kortasar, Markes, Borxes, Coys və digərlərin əsərlərinin həyatımda böyük rolu olub. Dostoyevski isə həyatımı tamamilə korlayıb (gülür). Dostoyevskini oxuyarkən ona özündən asılı olmayaraq inanmağa başlayırsan. Öz qəhrəmanları vasitəsilə bizə həqiqətləri çatdıran bu yazıçı düşüncələrimizi həm öz əsərlərinə, həm də öz şəxsinə yönəldir. Hal-hazırda Masrsel Prustun əsərlərinin birini oxuyuram.

Baku Book Center-ə gəlin, maraqlı kitab oxuyun və onları bizə tövsiyə edin!

Harada: