Kitab oxumağın ən düzgün üsulu ayaq üstə oxumadır. Tibb mütəxəssislərin əksəriyyəti məhz bu cür düşünür. Bu üsul şuxluğunuzu, görmə qabiliyyətinizi və ümumi sağlamlığınızı qorumağa kömək edəcəkdir. Bu vəziyyət oksigenin bədənə lazımi miqdarda daxil olmasına imkan verir. Ağciyərdə oksigen bolluğu isə beynin normal fəaliyyətini təmin edir və alınan məlumatların daha yaxşı mənimsənilməsinə kömək edir.
Ayaq üstə oxuyarkən siz, həmçinin sifətinizdən kitabadək məsafəni və kitabın yeriini düzgün tənzimləyə bilirsiniz. Həkimlər qeyd edir ki, kitabı gözlərdən 30-40 santimetr məsafədə saxlamaq lazımdır, başınızın maillik bucağı isə kitabın maillik bucağına uyğun olmalıdır. Lakin ayaq üstə oxumaq sizə heç cür uyğun gəlmirsə, sağlamlığa az zərər vuran vəziyyətdən istifadə etməlisiniz. Gəlin araşdıraq:
Düzgün vəziyyət:
Yalnız ayaq üstə kitab oxumaq çox çətindir. Əgər buna hazır deyilsinizsə, kitabı masa arxasında oxumalı, kitab oxuyarkən bədəninizi 135 dərəcə bucaq altında meyl etdirməli, oturacağın, divanın və ya kreslonun kürəyinə söykənməli, ayaqlarınızı isə bədəninizdən qarşısında yerləşdirməlisiniz. Həmçinin əllərinizi də qarşınızda, masanın üzərində yerləşdirin. Bütün sətirlər gözlərinizlə eyni məsafədə yerləşməlidir. Boğazınızı uzatmayın, başınızı düz saxlayın. Başınızı sağa və ya sola əyməyiniz rahatlıq versə də, şuxluğunuza mənfi təsir göstərir.
Nəfəsinizə diqqət yetirin. Oxuyarkən hər yarım saatdan bir neçə sadə hərəkət etmək faydalıdır: dərindən bir nəfəs alıb, havanı büzülmüş dodaqlarınızdan çıxarın. Müəyyən vaxtdan bir kiçik fasilələr edib, həmçinin bir-iki fiziki hərəkət etməyiniz də pis olmazdı. Vəziyyətinizin rahat olmasına baxmayaraq, uzun müddət eyni vəziyyətdə qaldıqda siz öz əzələlərinizi gərginliyə məruz qoyursunuz. Həmçinin işıqlandırma haqqında da düşünməyiniz gərəkdir. Harada olmanızdan asılı olmayaraq işığın "işlək əliniz" tərəfdən düşməsinə çalışın.
Səhv vəziyyət:
Gəlin etiraf edək ki, kitabsevərlərin böyük əksəriyyəti kitabı uzanaraq oxumağı sevir. İlk baxışda rahat görünən bu mövqe insan orqanizmi üçün çox zərərlidir.
Birincisi, üzə və ya qarnı üstə uzandıqda sizin döş qəfəsiniz təzyiq altında olur. Bu, oksigenin ağciyərə daxil olmasına mane olur və sevimli qəhrəmanlarla birlikdə olmaq əvəzinə siz yuxuya gedirsiniz. İkincisi, kitab əlinizdə olarkən horizontal vəziyyətdə olmağınız onurğa sütununuzu ən qeyri-təbii şəkillərdə əyir və ona mənfi təsir göstərir.
Bundan əlavə, həmçinin kitabı dizlərinizin üzərinə qoyub oxumaq də tövsiyə olunmur. Bu zaman kitabla gözlər arasında məsafə qənaətbəxş olmur və siz astiqmatizm və ya digər xəstəliklər "qazana" bilərsiniz.
Gözlərinizə ən böyük zərəri isə kitabın nəqliyyatda oxunması verə bilər. Kitabsevərlərin kitab oxuması üçün vaxtın həmişə az olmasını nəzərə alsaq, onların kitabı nəqliyyatda olduqları müddətdə oxumalarını anlayarıq. Lakin həkimlər bunun qəti əleyhinədir. Əsmə gözlər üçün əlavə gərginlik yaradır ki, bu da sağlamlıq problemlərinə səbəb olur. Xoşbəxtlikdən, müasir dünyamızda audiokitablar var.
Oxuyun və sağlam olun!
