Bu dəhşətli söz düzgün qidalanma qaydalarına riayət edən və öz rasionuna diqqət yetirənləri qorxuya salır. Son zamanlar həkimlər əvvəlkindən daha çox "qlüten dözümsüzlüyü" diaqnozunu qoyur. Bu diaqnozlu şəxslərin qidasında bu maddənin hətta çox kiçik miqdarının olması belə ciddi fəsadlarla nəticələnə bilər. URBAN Bakıda qlütensiz ərzağın satıldığı məkanları tapıb.
Supermarketlər
İlk addım böyük supermarketlərin pəhriz şöbəsinə baxmaqdır: orada qlütensiz peçenye, düyü unu və digər faydalı məhsullar ala bilərsiniz. Bravo, Bazar Store, Araz, Favorit və Neptun supermarketlərinin qlütensiz məhsul çeşidləri bir-birindən çox da fərqlənmir. Yuxarıda adları çəkilən supermarketlərdən fərqli olaraq Kontinental supermarketində daha çox qlütensiz alman və italyan məhsullarını almaq olar. Qeyd edək ki, qiymətlər də burada bir qədər fərqlidir: buradakı qlütensiz məhsullar yuxarıda adları çəkilən supermarketlərdəki qlütensiz məhsullardan 2-3 dəfə bahadır.
Supermarketlərdə, həmçinin badam və yulaf südü kimi tərkibində laktoza olmayan məhsullar da var. Laktozasız pendir Bravo və Bazar Store mağazalarında satılır.
Dr. Schär məhsulları - Port Baku Bazar
1922-ci ildən sağlam pəhriz üçün qida istehsal edən Dr. Schär şirkəti təxminən qırx il əvvəl qlütensiz qida bazarına daxil olub. Un, şirin bişinti, sıyıqlar və yarımfabrikatlar qlütensiz qidanın əsasını təşkil edir. Ümumilikdə bu şirkət uşaqlar və böyüklər qidalanması üçün təxminən 120 fərqli məhsul təklif edir. Bu məhsulları Port Baku Bazar-da əldə etmək olar.
Saf Qida
Safqida-da təzə süd və süd məhsulları, eləcə də müxtəlif növ təbii mürəbbələr və çaylar əldə etmək olar. Şirniyyatsız yaşaya bilmirsinizsə, Səməd Vurğun küçəsi, 86 və Şəmsi Bədəlbəyli küçəsi, 96 ünvanlarında yerləşən mağazalardan qlütensiz şirniyyat almağa tələsin.
Urbech Baku
Urbeç – uzun müddət davam edən xəstəlikdən sonra gücün bərpa edilməsinə səbəb olan, xəstəliklərə qarşı immuniteti artıran və enerji verən əzilmiş və qovrulmuş toxum və ya qoz-fındıqdan alınmış qeyri-adi bir pastadır. İstehsal etdiyi xammaldan asılı olaraq Urbeç müxtəlif vitamin və minerallarla doludur: kətan A, B vitaminləri və selen çatışmazlığını aradan qaldırır, ərik ləpəsi antioksidanlar mənbəyidir, fındıqda isə maqnezium, kalsium, natrium və sink var. Urbech Baku-da tərkibində qlüten olmayan təbii urbeç almaq olar.
Sweet_not_sweet_baku
Hazır pəhriz şirniyyatlarını və şirin bişintini fud-blogger catmaycook-un səhifəsində sifariş vermək olar. Buradakı tortların, peçenyelərin və çiskeyklərin heç birində şəkər, qlüten və trans yağ yoxdur. Kaloriyə diqqət yetirənlər üçün menyuda məhsulun tərkibindəki yağların, zülalların və karbohidratların miqdarı göstərilir.
iHerb saytında sifariş edin
iHerb – müştərilərə üzvi məhsullar təklif edən məşhur Amerika onlayn mağazasıdır. Vitamin, bioloji əlavələr və digər faydalı məhsulla dolu olan bu mağazada gluten-free şöbəsi fəaliyyət göstərir. Qlütensiz məhsullar şöbəsində şərbətlərə, zərərsiz şəkərəvəzedicilərinə, qoz pastalarına, müxtəlif un növlərinə, bişinti qatqılarına və ədviyyat növlərinə diqqət yetirin.
Endokrinoloq və diyetoloq Şeyda Kəlbalıyevanın şərhi:
Qlüten – buğda, arpa və çovdarın tərkibində olan yapışqan bir zülaldır. Müvafiq olaraq, buğda, arpa və ya çovdar unundan hazırlanmış məhsullarda tez-tez allergik reaksiyaya səbəb olan qlüten var. Bu zülala qarşı anadangəlmə dözümsüzlük, yəni seliakiya xəstəliyi özünü, bir qayda olaraq, erkən uşaqlıqda büruzə verir. Lakin çoxları qlütenə qarşı ifrat dərəcədə həssas olduğunu və qlütenin onda allergik reaksiya törətdiyini bilmir.
Bu allergik reaksiya özünü necə büruzə verir? Bişinti yedikdən sonra özünüzü pis hiss edirsiniz: gəyirmə, qazburaxma, köpmə, mədənin narahatlığı. Bundan əlavə, yapışqan maddə olaraq qlüten həzm sistemindəki digər yeməklərin tərkib hissələrini "bir-birinə yapışdırır" və bununla da köpməyə və ağırlığa səbəb olur. Bu vəziyyət arıqlamaq istəyənlər üçün də əlverişsizdir: bu zərərli kütlədən insan orqanizminin qidalandırıcı maddələr əldə edə bilmir. Çox vaxt qlüten dözümsüzlüyü olan insanlar dolğun olur və eyni zamanda vitamin çatışmazlığından əziyyət çəkirlər.
Beləliklə, çörək, lavaş və digər bişinti ilə birgə yeyilən istənilən məhsul zərərli yapışqan kütlənin meydana gəlməsinə səbəb olur.
Qlüten dözümsüzlüyü olan xəstələrdə allergik reaksiyalar olduqca tez-tez baş verir, lakin çoxları bu əlamətləri digər xəstəliklərlə əlaqələndirərək bunun nə olduğunu başa düşmür. Allergiya zamanı bağırsaq mikroflorası pozulur. Bundan əlavə, həzm edilməsi çətin olduğundan yapışqan kütlə bütün həzm sistemində iltihaba səbəb olur.
Qlüten əsasən aşağıdakı məhsulların tərkibində olur: buğda, arpa, çovdar. Qeyd edək ki, ona yalnız bişintidə deyil, souslarda da, ketçuplarda da, müxtəlif şirniyyat məhsullarında da, dondurmada da rast gəlinir.
Qlütensiz məhsulları bəs siz haradan alırsınız?
