2021-ci il Kann festivalında yaxşıların ən yaxşısı adını kim qazanıb?

Festivalı Chopard Zərgərlik Evinin bir sənət əsəri olan “Qızıl palma budağı” mükafatı ilə kim tərk edib? Münsiflər heyəti öz cəsarətli seçimi ilə bu dəfə çoxlarını təəccübləndirib.

«TITAN»

Bu filmin nümayişi zamanı festivalın bəzi qonaqlarını "Təcili yardım" əməkdaşları aparıb. Bəli, bəli, bu, zarafat deyil. Fransız rejissoru Juli Dykornonun dəhşət səhnələrini izləmək o qədər çətin olub.

Buna baxmayaraq, festivalın əsas mükafatı olan "Qızıl palma budağı"nı məhz “Titan” filmi qazanıb. Bəlkə filmin əsas diqqət çəkən məqamı onun baş qəhrəmanının (transgender) onunla münasibət axtaran bütün insanları öldürməsidir? Və ya sonda öz ürəyini və bədənini kadillaka verib ondan dünyaya uşaq gətirməsidir? Buna qan, şiddət, sifarişli qətllər və baş qəhrəmanın iştirak etdiyi sonsuz orgiya səhnələrini əlavə edin.

Əslində isə filmin yaradıcıları valideyn sevgisindən məhrum olan qəhrəmanın əvvəlcə insanları sevməyi necə unutduğunu, sonra da onu övladlığa götürən atası və mexaniki övladı sayəsində yenidən sevgi sevinclərini anladığını göstərmək istəyib.

Heyrətlənmiş Juli Dyukorno-ya mükafat Dolce & Gabbana donunu geyinmiş və Chopard Evinin zərgərlik əşyalarını taxmış gözqamaşdıran Şaron Stoun tərəfindən təqdim edilib.

"QƏHRƏMAN" VƏ YA "ALTI NÖMRƏLİ KUPE"?

Qran-pri İranlı Əsgər Fərhadinin “Qəhrəman” və Juho Kuosmanenin “Altı nömrəli kupe” filmlərinin arasında bölünüb.

"Qəhrəman" filmi İranın adi vətəndaşlarının həyatına daxildən baxmağa imkan verən güclü bir sosial dramdır. Bir qadının içərisində pul olan itmiş pul kisəsini onun özünə qaytaran və dərhal bütün sosial şəbəkələrin qəhrəmanına çevrilən uğursuz bir həbsxana məhbusunun hekayəsi. Bəs o həqiqətən də qəhrəmandırmı? Sonunadək izləməli və öz nəticələrimizi çıxarmalıyıq.

Finlandiya rejissoru Juho Kuosmanen öz filmini eyni zamanda dörd ölkədə çəkib: Finlandiya, Estoniya, Rusiya və Almaniya. Filmdə Finnlandiya tələbəsi Laura öz sevgisindən xilas olmaq üçün Moskvadan Murmanska qatarla gedir. Kupedə onun Lyoxa adlı sərxoş bir rus mədənçisi ilə tanış olacağını kim düşünə bilərdi? Çox maraqlıdır...

«ANNET»

Bu müziklla Kann Festivalı açılmışdır və hər kəs onun əsas mükafatı qazanacağını söyləyirdi. Lakin “Titan” onu üstələdi.

Bu səbəbdən Fransız rejissoru Leos Karaksın İngilis dilində çəkdiyi "Annet" filmi Ən Yaxşı Rejissor İşi mükafatına layiq görülüb. Rejissorun özünün mərasimə qatıla bilmədiyindən (ya da istəmədiyindən), fəxri mükafatı filmin ssenari müəllifləri və bəstəkarları, Sparks qrupunun yaradıcıları və üzvləri Ron və Russell Mal alıblar.

Filmin baş qəhrəmanları öz təxribat xarakterli çıxışları ilə tanınan stand-up komediyaçısı və beynəlxalq səviyyəli məşhur bir müğənnidir. Bu, Los-Ancelesin ən gözəl və ən xoşbəxt cütlüyüdür. Lakin tezliklə bunun müvəqqəti olduğu aşkar olur. Belə ki, bu cütlüyün inanılmaz istedada malik Annet adlı bir qızı dünyaya gəlir. Və bununla da qəhrəmanların həyatları alt-üst olur.

«MAŞINIMIN SÜKANI ARXASINDA»

Kann Film Festivalının ən yaxşı ssenari mükafatı birbaşa Yaponiyaya gedib. Onu Ryusuke Hamaquchi-nin “Maşınımın sükanı arxasında” kinofilmi qazanıb.

Bu film "Qadınsız Kişilər" kolleksiyasından Haruki Murakami hekayəsinin ekranlaşdırılmasıdır. Filmdə bir teatr rejissoru Çexovun "Vanya dayı" tamaşasını Hirosimadakı bir festivalda səhnələşdirməyə dəvət olunur. Və orada onunla onun kepkalı azdanışan qız sürücüsü arasında münasibət qurulur. Bu bir qədər fəlsəfi filmdir – keçmişlə barışmaq və həyatı olduğu kimi qəbul etmək haqqında bir hekayədir.

«NİTRAM»

Amerikalı musiqiçi Kaleb Landry Jons Avstraliyalı rejissor Justin Kurzel-in "Nitram" filmindəki roluna görə ən yaxşı aktyor seçilib. Film real hadisələrdən, yəni Port Arthurda (Avstraliya) 1996-cı ildə baş verən kütləvi qırğından bəhs edir. O zaman ümumilikdə 35 nəfər ölüb. Tənqidçilər yekdilliklə filmdə Nitram ləqəbini daşıyan Kalebin yüksək səviyyəli inandırıcı performansını qeyd ediblər.

«DÜNYANIN ƏN PİS ADAMI»

Norveçli Renate Reinsve Kann Film Festivalının ən yaxşı aktrisası seçilib. Jokim Trierin "Dünyanın ən pis adamı" filmində o, karyerasını qurmağa və şəxsi həyatındakı qarışıqlıqdan can qurtarmağa çalışan 30-yaşlı bir qız rolunu oynayıb.

Tənqidçilər bu filmi otuz yaşında insanları qorxudan və ilham verən, incidən və xilas edən, düşündürən və yayındıran şeylər haqqında səmimi söhbət adlandırır. Onlar proqnozlarına görə bu film “əbədi klassika”ya çevrilə bilər.

Bizə isə növbəti Festivalda nələrin baş verəcəyini təxmin etmək qalır. Bir şey dəqiqdir: Kann Film Festivalının ən çox iri mükafatı Chopard Zərgərlik Evinin bacarıqlı sənətkarlarının yaratdığı Qızıl palma budağıdır!