Yanvarın 21-də əfsanəvi Haute Couture yaradıcısı, dahi kuturye Kristian Dior dünyaya gəlmişdir. Onun 50-ci illərdə dünyanı əhatə etmiş ideyaları bu günə qədər aktualdır. Böyük ustadın ad günündə DiorDe üslubunun yaranmasında yardımçı olan qaydalarını xatırlamaq yerinə düşərdi.

Modelyerin demək olar ki, əsas icadı - qadın seksuallığının simvolu olan new look ətəyidir. İncə silueti çiçəyi xatırladan bu ətək bütün bədən quruluşlarına uyğun gəlir.

Qadın gözəlliyini tərənnüm edən Dior onu zərif aksessuarlarla vurğulamağı təklif edir. Məsələn, sadə qara əlbisəni qiymətli daşqaşlardan ibarət boyunbağı ilə bəzəsəniz, siz bütün axşam diqqət mərkəzində olacaqsınız. Dizayner baş geyimlərinə böyük əhəmiyyət verirdi. Onun fikrincə, papaqsız qadının obrazı sonlandırılımış hesab edilmir. Çanta və ayaqqabıların seçiminə isə çox diqqətlə yanaşırdı.

Kristian Diorun 2 sevimli rəngi var idi: çəhrayı və boz. Həyatsevər çəhrayı rəng hər zaman qadınların heyranlıq obyektinə çevrilirdi. Lakin dizayner bütün dünyaya sübut etdi ki, boz rəng təkcə rəsmi qəbullara və mərasimlərə geyinilən, solğun və darıxdırıcı rəng deyil. Əsas, geyimləri uyğunlaşdırmağı bacarmaq və eksperimentlərdən qorxmamaqdır.

Diorun daha bir qaydası: alt paltarı özünə əminliyin şərtidir, onsuz isə zərif görünmək mümkün deyil. Alt paltarı incə olmalı və qüsursuz  oturmalıdır. Dizayner qarderobu yeniləyərkən nəinki əlbisələrə, hətta alt geyimlərinə də diqqət yetirməyi məsləhət görürdü.