Dünən Avropa Oyunlarına 100 günün qalması münasibətilə tədbir keçirildi.

fairmont otelində keçirilən tədbirdə Avropa Oyunlarının medalları təqdim olundu. Medalların dizaynı ilə Rusiyanın "Adamas" zərgərlik şirkəti və azərbaycanlı rəssam Nərgiz Hüseynova məşğul olurdu. medalin mərkəzində Avropa Oyunlarının logotipi yerləşdirilib. Kənarlardan şərq ornamentləri ilə haşiyələnib. Xatırladaq ki, dizaynın özü 2013-cü ildə Adam Yunusov tərəfindən hazırlanmışdır.

Təqribən XVI-XVII əsrlərdən başlayaraq, medallar təkcə hərbi mükafat kimi istifadə olunmurdu. Onu mülki şəxslərə ölkə, şəhər qarşısında və ya professional xidmətlərinə görə təqdim edirdilər. Onları idmançılara da təqdim etməyə başladılar. lakin medalların ali idman nailiyyəti kimi məşhurlaşması Olimpiya Oyunlarının bərpasından sonra baş vermişdi. Qədim Yunanıstanda idman oyunlarının qaliblərini dəfnə tacı, pul və kubokla mükafatlandırırdılar. 1894-cü ildə isə Olimpiya Komitəsi idman oyunlarının qalibləri üçün mükafat olaraq, idman medallarının yaradılması haqqında qərar qəbul edir. Məhz o zaman da medalların qradasiyası yaradılır - qalibiyyətə görə qızıl medal, digər iki mükafat yerlərinə görə isə gümüş və bürünc medallar təqdim olunur.

Əlbəttə, idmançılar medallara görə yarışmırlar. Bu onların üstünlük, əzmkarlıq, ruh güclərinin simvoludur. Onların və təmsil etdikləri ölkənin qalibiyyət simvoludur. Ona görə də, ömrünü idmana həsr etmiş insanlar üçün bu qədər dəyərlidir.