Dövlət Gömrük Komitəsinə müraciət etdik və Azərbaycana hansı əşyaların gətirilməsinin qadağan olunduğunu öyrəndik.

• Saxta kağız və metal pullar;
• narkotik və psixotrop maddələr;
• narkotik və psixotrop maddələrin istifadəsi vasitələri;
• narkotik, psixotrop, zəhərli, partlayıcı maddələrin istehsalı texnologiyası ilə əlaqəli maddəllər;
• pornoqrafik materiallar və ya əşyalar;
• əxlaqsızlığı, zorakılığı, terrorizmi təbliğ edən və reklam edən materiallar;
• silahlar və silah sursatları (ov silahları üçün materiallar istisna olmaqla);
• bütün hərbi təyinatlı əşyalar;
• partlayıcı maddələr;
• hərbi texnika;
• radioaktiv maddələr;
• vaxtı keçmiş məhsullar və tez xarab olan məhsullar.

Dronlar Azərbaycana Dövlət Hava Nəqliyyatı İdarəsindən xüsusi icazə alaraq gətirilə bilər.

Qadağan olunmuş əşyanın taleyi necə olur?

Qara siyahıda olan əşyanın dərhal gömrük ərazisindən kənara çıxarılması lazımdır (daha sadə dillə desək, o, satın aldığınız ölkəyə geri qaytarılmalıdır). Bu zaman bütün xərclər yalnız onun sahibinin üzərinə düşür. Onu dərhal qaytara bilmirsinizsə, həmin əşya gömrükdə qalır: müəyyən bir müddətin sonunda (Gömrük Komitəsinin dediyinə görə 40 gün) gömrük orqanının həmin əşyanı məhv etmək hüququ yaranır.

Fiziki şəxslər Azərbaycana nə gətirə bilər?

Dövlət Gömrük Komitəsindən verilən məlumata görə, bir şəxsin bir təqvim ayı ərzində 1500 ABŞ dolları dəyərində mal idxal etmək, eləcə də hər 30 gündən bir öz adına dəyəri 1000 ABŞ dollarından çox olmayan mal sifariş etmək hüququ var. Malın dəyəri 1000 dolları keçərsə, 36% haqq ödənilməli olacaq.

• Sərhədi avtomobil ilə keçdikdə yanacaq çəninin həcmində yanacaq gətirmək olar.
• Şəxsi istifadə üçün dərman idxalına icazə verilir.
• Sizə miras qalan əşyaları idxal edə bilərsiniz.
• Turistlər ticarət üçün nəzərdə tutulmayan şəxsi əşyalarını idxal etmək hüququna malikdir.

Fiziki şəxs ayda bir dəfə Azərbaycan ərazisinə aşağıdakıları idxal edə bilər:

• 1,5 litr spirtli içki;
• 20 qram qızıl və bu metaldan hazırlanan məmulatlar (Komitə qeyd etdi ki, sizin "öz üzərinizdə" nə qədər qızıl keçirdiyizə heç kim heç nə deyə bilməz);
• 200 siqaret;
• 30 kiloqram ərzaq məhsulları;
• 5 kiloqram nərə balığı;
• 125 qram nərəkimilər kürüsü.

Ölkəyə eyni markalı iki maldan daha çox idxal etsəniz, onlar kommersiya təyinatlı mal sayılacaq. Rüsumu ödəməsəniz və malı bəyannamədə qeyd etməsəniz, onlarla vidalaşmalı olacaqsınız: onları alıb anbarda saxlayacaqlar. Bizə Komitədə dediyildiyi kimi, mallar geri göndərilmədikdə gömrük orqanı onları məhv edir və ya onlarla istədiyi kimi rəftar edir.

Belə çıxır ki, hər ay, məsələn, iki telefon idxal etmək olar?

Dövlət Gömrük Komitəsində bu suala da cavab verdilər:

"Azərbaycan ərazisinə telefon idxalını tənzimləyən xüsusi bir qanun yoxdur. Bu və ya digər malların təyinatını gömrük orqanı müəyyənləşdirir. Şəxsi istifadə üçün ildə iki telefon idxal etsəniz, heç bir problem yaranmaz. Lakin siz hər həftə gömrükdən iki və ya üç telefon keçirsəniz, ticarət fəaliyyəti olduğu üçün bu, çox güman ki, Gömrük Komitəsinin diqqətini cəlb edəcək".

Başqa sözlə: nə qədər çox idxal etsəniz, bir o qədər çox şübhə doğuracaq ...

Əşyanızın qadağan olunmuş siyahısında olub olmadığını və gömrükdə hər hansı bir probleminiz olub olmayacağını öyrənmək istəyirsinizsə, 195 (6) telefon nömrəsilə Gömrük Komitəsinin qaynar xəttinə zəng edin. 

* Məlumat 15 yanvar 2020-ci il tarixi üçün doğrudur.