İlk murallar artıq paytaxtımızda! İki qarşı-qarşıya durmuş onmərtəbəli binanı bəzəyən bu murallar Azərbaycan kişisi və qadının təsviridir. Onları birləşdirsək, ürək şəkli alınar.

Əsəri "Advanced Industrial Solutions" MMC-nin sifarişi ilə muralist rəssam Georgi Kurinov yaradıb. Bu çətin işdə ona qardaşı German Kurinov yardım edib. O, öz səhifəsində yazır:

"Bu layihənin eskizini yaratmazdan əvvəl mən Azərbaycan geyimi, musiqisi, mətbəxi, silahı, tarixi və digər ənənələrinə dair çoxlu sayda kitab oxudum və məlumat topladım. Böyük nəzəri iş apardım, bəzi geyim elementlərini tarixi muzeylə razılaşdırdım. Kompozisiyamın əsasını "Buta" milli naxışı təşkil edir. Qız olan təsvirdə "buta" sola burulur. Təsvirin mərkəzində tar milli musiqi aləti, aşağıda isə çiçək açan nar yer alır.

Kişi təsvirindəki "buta" sağa burulur. Bu əsərdəki ən əsas igidlik rəmzi ənənəvi naxışlarla bəzədilmiş "Kama" milli xəncəridir. İgidlik isə hər şeydən əvvəl Vətənin və evin qorunmasında təzahür edir. Doğma yurd rəmzi kimi mən Bakının məşhur görməli yerlərini, yəni İçərişəhər Qalasını, Qız Qalasını və Şirvanşahlar Sarayını seçdim.

"Bu təsvirlər gecə-gündüz bir-birinə baxır, lakin qovuşa bilmir. Burada şərq nağıllarının ənənəsi var".

Bu gözəlliyi Fətəli xan Xoyski küç., 110 ünvanında görmək olar.