Baku.ws xəbər verir ki, Bakı şəhər Dövlət Yol Polisinin məlumatına görə, son zamanlar yol-nəqliyyat hadisələrinin səbəbkarı daha çox piyadalar olur. İdarədə bildiriblər ki, Bakıdakı 50 yeraltı piyada keçidinin hər biri günün 24 saatı ərzində fəaliyyət göstərir. Lakin onlardan hamı istifadə etmir. Belə qayda pozanlar üçün cərimə 20 manatdır. Keçən il bu minvalla 122 min piyada cərimələnmiş, yol polisi isə xəzinəyə 2 milyon 440 min manat gəlir gətirmişdi. "Biz xarici vətəndaşlardan başqa heç kimə güzəştə getmirik. Onları isə saxlayaraq, vəziyyəti izah edir, bir daha səhv etməmələri haqda xəbərdar edirik" - patrul xidmətinin serjantı Ağa Niftəliyev bildirib. Qayda pozanların bütün kələkləri bizə yaxşı məlumdur. Onların əksəriyyəti yanlarında pasportun olmadığını bildirirlər. Belə halda onları bölməyə apararaq, protokol tərtib edirik. Son üç ay ərzində paytaxt üzrə 14 min protokol tərtib edilmişdir. Polislər bildirirlər ki, qayda pozanlar bundan sonra da cəzalandırılacaqlar.

Belə bir sual vermək istərdim: nəyə görə Bakı polisi xarici vətəndaşlara cərimə tətbiq etmir? Məgər xaricilər üçün qanun yazılmayıb? Onlara edilən bu hörmət nə ilə əlaqədardır? Qanunu bilməmək insanı məsuliyyətdən azad etmir axı. Bir də əlavə etmək istərdim ki, yol qəzalarına hər zaman piyadalar səbəb olmurlar. Düşünürəm ki, bir yolun bir tərəfində piyada zolağının olub, digər tərəfində olmaması hallarını xatırlamaq lazım deyil. Bu vaxt piyada nə etməlidir? Teleportasiya olunmalıdır?