Bakının Yasamal rayonundakı Şərifzadə küçəsində yerləşən 73 saylı binanın iki blokunda lift işləmir. Texniki olaraq, liftdə heç bir nasazlıq yoxdur. Tamamilə işlək lift heç bir xəbərdarlıq edilmədən dayandırılıb. 50-dən çox mənzilin sakini, o cümlədən, yaşlı insanlar və uşaq arabalı analar hər gün bu məsafəni piyada qət etmək məcburiyyətində qalıblar. Səbəb - "Bakıelekrtikşəbəkə" ASC-nin Mənzil-Kommunal İstismar Sahəsi ilə arasında yaranan anlaşılmazlıqdır. Buna baxmayaraq, blokun sakinləri hər ay vaxtı-vaxtında liftdən istifadə haqlarını ödəyirlər. 

Məlum olub ki, Bakı Şəhər İcra Hakimiyyəti nəznindəki Mənzil-Kommunal İstismar Sahəsi 2002-ci ildən bəri "Bakıelektrikşəbəkə" ASC-nə 15 min manat borcludur. "Bakıelektrikşəbəkə" ASC-nin tabeliyində olan Yasamal Rayon Enerji Təchizatı və Satışı İdarəsinin rəisi Maqsuq Məmmədov borcun olduğunu və adı çəkilən ünvanda elektrik enerjisinin verilməsinin icbari şəkildə dayandırılıdığı faktını təsdiqləyib. Eyni zamanda qeyd edib ki, borcun ödənilməsindən dərhal sonra elektrik enerjisinin verilməsi bərpa olunacaqdır.

MKİS-in müdir müavini Sabit Hüseynov isə borcluluq faktını təsdiqləmir və heç bir borc ödəmək niyyətində olmadığını bildirir: "Biz heç vaxt liftin elekrtik təminatı üçün pul ödəməmişik və ödək fikrimiz də yoxdur. Bu haqda Nazirlər Kabineti qərar belə qəbul etməyib".

Odur ki, sual açıq olaraq qalır. "Bakıelektrikşəbəkə" ASC borcun ödənməsini gözlədiyi, MKİS-in isə onu ödəmək niyyətində olmadığı müddətdə isə ahıl insanlar və uşaq arabaları ilə yüklənmiş analar yarı-dağınıq pilləkənlərlə qalxıb-düşməyə davam edirlər. Sual meydana gəlir ki, söhbət bu insanların valideynləri, həyat yoldaşları, uşaqlarından getsəydi, onlar yenə bu qədər biganə olacaqdırlarmı?

Yeri gəlmişkən, MKİS-ə daha bir sualımız var: bloklar belə acınacaqlı vəziyyətdədirsə, onun işçiləri nə ilə məşğuldur?