URBAN Bakıda satışa qoyulmuş ən qədim avtomobilləri toplayıb. Original görünmək istəyirsiniz? Belə maşınlarla dostlarınız öyünə bilməz.

Bakıda satışa çıxarılmış ən qədim avtomobil 1934-cü ilin Mercedes Gazelle avtomobili oldu. 80 ilə cəmi 50 min kilometr yol getmiş bu kabrioletin qiyməti Baki Cars salonunda 70 min dollardır.

Növbədəki avtomobil 1937-ci ilin GAZ M-1 modelidir. Qiyməti cəmi 200 min dollardır, getdiyi yol isə 120 min kilometr.

Üçüncü yerdə hər bir sovet vətəndaşının arzusu olan bej rəngli "Pobeda"dır (GAZ M-20 Pobeda), 1954. 200 min kilometr yol getmiş bu avtomobilin qiyməti cəmi 20 min dollardır. Avtomobil hələ hazırlanarkən, adını "Rodina" (Vətən) qoymaq planlaşdırılırdı. Bunu eşidən Stalin soruşub ki: "İndi Vətənin qiyməti neçə olacaq?" Odur ki, maşını "Pobeda" adlandırmaq qərarına gəliblər.

Amma 1963-cü ilin Lincoln Continental avtomobili isə amerikalı sürücülərin arzusudur. Taleyin təsadüfündən Bakıya gəlib düşmüş bu maşın cəmi 35 min kilometr yol gedib. Qiyməti isə 100 min AZN-dir.

Elə həmin ilin istehsalı olan, bamperində "Çayka" romantik yazısı olan avtomobil. 1963-cü ilin GAZ 13-ü 100 min kilometr gedib, qiyməti 150 min dollardır.

Bakıda daha bir amerikan arzusu - 1968-ci il istehsalı olan Chevrolet Caprice. 30 min kilometr yol gedib, qiyməti isə 50 min AZN-dir.

Bakıda satışa qoyulan avtomobillərdən bəziləri yalnız qlamur sarışınlara yaraşır. Məsələn, çəhrayı rəngli GAZ 21. 1970-ci istehsalıdır, cəmi 100 min kilometr gedib, o da toylara. Qiyməti 12 min dollardır.

Nəhayət, ən "cavan" avtomobil - 1978-ci ilin GAZ 24 modeli. Qırmızı rəngli, 155 min kilometr getmiş bu maşının qiyməti 14 500 dollardır.