“Baku HOG Azerbaijan” klubunun təşkilatçılığı və ANS Şirkətlər Qrupunun dəstəyi ilə azərbaycanlı baykerlərin “Böyük Yolun Yolçuları” adı altına azərbaycanlı baykerlərin növbəti motoyürüşü başlayıb.
ANS Şirkətlər Qrupunun prezidenti və “Baku HOG Azerbaijan”ın Baş direktoru Vahid Mustafayevin rəhbərliyi ilə Bakı-Tbilisi marşrutu üzrə yürüş edən baykerlərin əsas məqsədi 2016-cı ildə istifadəyə veriləcək
Bakı-Tbilisi-Qars dəmiryolunun tanıtımıdır.
ANS ÇM-in "Hər Səhər" şousunda canlı bağlantı zamanı ANS Şirkətlər Qrupunun Prezidenti Vahid Mustafayev ölkəmizin təşəbbüsü ilə start verilən bu layihənin region üçün böyük əhəmiyyət kəsb etdiyini və Prezident İlham Əliyevin sayəsində Ermənistanın layihədən kənarlaşdırılmasını xüsusi vurğulayıb.
“2016-ci ildən Azərbaycan xalqı bu yol vasitəsi ilə Avropaya, avropalılar isə Azərbaycana gəlib-getmək üçün yararlana biləcəklər”. Vahid Mustafayev baykerlərin bütün marşrutu 2 günə qət etməyə planlaşdırdığını açıqlayıb. Tbilisidə isə baykerlərimizin yürüşünə gürcü motosikletçilərin qatılacağı gözlənilir.
Vahid Mustafayev - “Baku HOG Azerbaijan”ın Baş direktoru
Bakı-Tbilisi-Qars dəmir yolu xəttinin təməli 2007-ci ildə Gürcüstanın Marab kəndində qoyulub. Dəmiryolu vasitəsi ilə Azərbaycan beynəlхalq nəqliyyat dəhlizlərinə və Türkiyəyə birbaşa gediş əldə edəcək. Dəmiryolu ilə bir günə Qarsa və İstanbula isə iki gün yarıma getmək mümkün olacaq. Bakı-Tbilisi-Qars dəmiryolu Bakı-Tbilisi-Ceyhan boru xəttindən sonra Azərbaycanın iqtisadiyyatını daha da inkişaf etdirəcək.
