Qara Qarayev - Azərbaycanın ən görkəmli bəstəkarlarından biridir. O, azərbaycan musiqisinin özündən sonrakı inkişafına təsir etmişdir.

Gələcək bəstəkar azərbaycan musiqisini dərindən bilən və sevən həkim-pediatrın ailəsində anadan olmuşdur. Atası oğlunun musiqi istedadının inkişafında böyük rol oynamışdır. Musiqi məktəbini bitirdikdən sonra, o, konservatoriyaya daxil olaraq, Üzeyir Hacıbəyli kimi dahi bəstəkardan dərs almışdır.

1937-ci ildə Qarayev folklor ekspedisiyasında iştirak edərək, aşıq musiqisi və muğamları öyrənmişdir. Bir ildən sonra o, Çaykovski adına Moskva Dövlət Konservatoriyasına qəbul olur və uğurla oranı bitirir. Diplom işi olaraq, o, İkinci simfoniyasını yazaraq, öz istedadını daha gözəl biruzə verir.

Onun yaradıclığı musiqinin demək olar ki bütün janrlarını əhatə edir. Onun ekspressiv, romantik, rəngarəng üslubu milli musiqinin əlvan əsərlərini yaradır. Ən əhəmiyyətli əsərləri "Yeddi gözəl" və "Leyli və Məcnun" baletləridir.