Vikipedianın ünvanına çox vaxt tənqid eşidirk. Ona görə ki, internetin istənilən istifadəçisi sayta məqalələr yükləmək imkanı olduğundan, ensiklopediyadakı məlumatın düzgünlüyünə etibar etmək mümkün deyil. 

Doğrudur, bu belədir. Lakin daha bir həqiqət də var ki, insan ümumdünya şəbəkəsi vasitəsilə bildiklərini bölüşərək, ehtiyacı olan minlərlə insana yardımçı olur. Məlumata isə ehtiyat və məsuliyyətlə yanaşmaq lazımdır. Hər bir istifadəçi bu qaydalara əməl etsə, ensiklopediyaya heç kəsin şübhəsi qalmayacaq. 

Vikipedianın üstünlüyü də elə bundadır - insan özünü qlobal səviyyədə vacib və əhəmiyyətli bir işə şərik hiss edir. Məsuliyyətsizlik isə hətta ən ciddi, elmi və akademik çevrələrdə də biruzə verə bilər. İnsan faktorunu hələ heç kim ləğv etməyib.

Vikipedia dünyanın 277 dilində yaradılır, 30 mln-dan çox məqaləyə sahibdir, dünya üzrə ən çox ziyarət edilən saytlar sırasındadır. 2013-cü ildə onu 517 mln insan ziyarət edib və o, tarix boyu yaradılan ən böyük ensiklopediyadır.

Saytın yaradıcısı Cimmi Ueylsi Nils Bor mükafatı ilə təltif edən zaman o, bu sözləri demişdir: "Vikipediya - hal-hazırda yaşadığımız qarşılıqlı əlaqə dövrünün simvoludur. Bu sadəcə bir alət deyil, insan intellekti və İskəndəriyyə kitabxanası qədər qədim bir ideyanın təcəssümüdür".