Bəli, Bakı tikintilərin içində itib-batır. Bunun həm müsbət, həm də mənfi cəhətləri var. Bəzi restavrasiya işləri Bakı sakinləri tərəfindən birmənalı qarşılanmır. Deyək ki, "Mirvari" kafesinin yenidən bərpası uğurlu restavrasiya adlandırıla bilər. O, xarici görünüşünü dəyişməmiş, bunun hesabına da individuallığını qoruyub saxlaya bilmişdir. 

Kardinal işlərin köhnə, hamımıza tanış yerləri necə dəyişməsinə misal "Sadko" kafesinin və onun yerləşdiyi köhnə pirsin bərpası ola bilər. Bu məkan bakılıların ən sevdiyi yerlərdən biri idi. Buradan şəhərə və dənizə açılan mənzərə hamını heyran edirdi. Hal-hazırda bu ərazidə aparılan təmir işləri Caspian Sea Water Pavilion layihəsi ilə əlaqədardır. Deyilənə görə, layihə bu yerləri tanınmaz dərəcədə dəyişəcəkdir. Buna yalnız sevinmək olar. Axı həmin məkan əvvəllər heç bir özünəməxsus memarlığı ilə seçilmirdi. Sahildən 200 metrlikdə yerləşən sadə 4 divar və tavandan ibarət idi. Layihənin isə maraqlı olacağı gözlənilir. Nə demək olar, gözləyərik - görərik.