Ditrix dekabrın 27-də Berlin yaxınlığında dünyaya gəlmişdi. Uşaqlıqdan musiqi və kinoya maraq göstərirdi. 20-ci illərdə Almaniyanı iqtisadi böhran bürümüşdü. Birtəhər yaşamaq üçün Dirtix kabareyə işə düzəlir. Elə həmin dövrdə də o, aktrisa olmaq qərarına gəlir. Onun kinokaryerası Cozef fon Şternberqin onu "Mavi mələk" filminə dəvətindən sonra başlayır. Bu film demək olar ki, Ditrixin sonrakı illərdə uğurla daşıdığı parlaq, əlçatmaz, gözlərində yüngül melanxoliya və seksual aclıq əks olunan cazibədar qadın obrazını formalaşdırdı. Filmin uğuru amerika kino istehsalçılarının marağına səbəb oldu və ilk təklifdən dərhal sonra Marlen Ditrix Hollivudau fəth eləməyə getdi.

30-cu illərdə çəkilən bütün filmlər uğurlu idi və Ditrixə inanılmaz şöhrət gətirirdi. Hebbels bir neçə dəfə onu istədiyi rejissoru, ssenarini seçmək imkanı ilə şinikləndirərək, vətənə dönməyə çağırırdı. Lakin aktrisa bütün təkliflərə rədd cavabı verirdi. Müharibə dövründə o, aktrisalıq fəaliyyətinə son qoyaraq, hərbi hissələrdə konsertlərlə çıxış edir.

40-cı illərdən sonra aktrisa kiçik rollarda çəkilir, daha çox Las-Veqasda aparıcılıq və müğənnilik edirdi.

Rəsmi olaraq, Marlen Rudolf Ziberlə evli idi və bu nigahdan Mariya adlı qızı var idi. Amma 5 illik ailə həyatından sonra, onlar ayrılmışdılar. Aktrisanın çoxsaylı məhəbbət macəralarından yazıçı Remarkla və aktyor Qabenlə olanları xatırlamaq olar. Ölümündən 15 il sonra dünya aktrisanın Ernest Heminqueylə çoxillik yazışmasını aıkar etmişdi.

Aktrisa 1992-ci ilin may ayında dünyasını dəyişmişdir. Onunla vidalaşmaq üçün üç mindən çox pərəstişkarı gəlmişdi.