Biz məşhur Pandawa çimərliyinə də baş çəkdik, amma heç maşından belə düşmədik. Turistlərlə dolu avtobuslar, oturacaqlar, kafelər, insan çoxluğu tamamilə istirahət ab-havası yaratmırdı.

Dayanacaq və iki nəfərlik giriş üçün düz bir dollar ödəyib, maşınımızı tərk etmədən geri döndük. Bu çimərlik ona aparan yolla tanınır. Qayaların dərinliyində heykəlciklər quraşdırılıb. Amma qeyri-adi bir şey yoxdur.

Bukitdə serferlərin sevimli bir çimərliyi var. O, suyunun təmizliyi ilə olmasa da, balıq restoranları ilə məşhurudur. Bu, Cimbarandır.

Doğrudur, burda da çimib qaralmaq günəşlənmək mümkündür. Çimərlik genişdir və qumu çox gözəldir. Amma suyu firuzəyi deyil. Baunti reklamını xatırlatmır. Ona görə də, ən yaxşısı, bura axşamayaxın gəlib, qürubu seyr edərək, məharətlə hazırlanmış lobster və krevetləri dadmaqdır.

Dəniz məhsullarının qiyməti burada bizimkilərə nizbətən dəfələrlə ucuzdur. Seçim isə çoxdur.

Bukitdən çıxıb şərqə doğru hərəkət etsəniz, qarşınıza çıxan ilk çimmək üçün yararlı çimərlik Sanur olacaqdır.

Çimərliyin sahili otel və mehmanxanalarla doludur. Su təmiz, qumu yaxşıdır. Yemək, içmək - hamısı yaxındadır. Məhz elə bu səbəbdən mən bu çimərliyi sevmirəm. Daha sakit və tənha yerlərdən xoşum gəlir.

Sonra biz yenə də materikə qayıdaraq, Balinin şərq sahilinə yola düşdük. Yolumuz Amedə idi. Ondan öncə isə biz adanın ən yaxşı çimərliklərində günümüzü keçirməyə qərar verdik. İlk dayanacağımız Padang Bai Beach oldu.

Əslində bu, başqa adalara gəmilərin getdiyi limandır. Amma onun sağı və solu ecazkar çimərliklərlə zəngindir. Liman olduğuna baxmayaraq, çimərliklərin suyu büllur kimi şəffafdır. Keçən il isə mən orada delfin dəstəsi görmüşdüm.

Blue Lagoon Beach

Həmin delfinləri gördüyüm yer. Burada hətta mərcanlar da var. Çimərlik balacadır və bir neçə xala dərhal sizə yaxınlaşaraq bədəninizi massaj eləməyə başlayır. 1 saat massaj 5 dollardır. Çimərliyə aparan kiçik pilləkəndən gözəl mənzərə açılır. Çimərliyin suyu tünd-firuzəyidir.

White Sand və ya Secret Beach limandan sağda yerləşir və ora yalnız gəzərək gedə bilərsiniz.

Pilləkənlər yoxdur, balaca cığırdır. On dəqiqəlik piyada yoldur. Siz şəffaf suyu və ağappaq qumu olan sakit və tənha çimərliyə çatacaqsınız.

Çimərlikdəki  çadırlarda yerləşən kafelər sizi sadə, amma dadlı yeməklərlə sevindirəcək.Assortimentdə kokos da var.

White Sand / Virgin Beach - adanın ən yaxşı çimərliyidir.

Avtomobil dayanağına çatar-çatmaz bunu anlayacaqsınız.

Hündür palmalar, ağappaq qum, firuzəyi rəngli gözəl su. Dalğa yoxdur. Çimərlikdə təzə dəniz məhsulları təqdim edən kafelər var. Kokoslu içki sifarış etdikdə isə, pulsuz oturacaq əldə edirsiniz.

Daha bir bonus - pilləkənləri düşmək lazım deyil. Mənfi cəhəti - bu, turist zonasından ən uzaqda yerləşən çimərlikdir. Amma bura gəlməyə dəyər.

Amed.

Amed çimərlik kimi deyil, dəniz sahilidir. Bu, mərcan rifləri ilə zəngin sonsuz, təmiz sahildir. Turistlər bura məhz snorklinqə görə gəlirlər.

Bunun üçün Amed ən gözəl çimərlikdir. Sahilin qumu vulkanik və qaradır. Amma Capaniz-biç başdan-başa daşlıqdır.

Belə travmatik girişin əvəzində sahilin 30 metrliyində ikinci dünya müharibəsi dövründə batmış gəminin qalıqlarına tamaşa edə bilərsiniz. Üstəlik bunun üçün dalğıc geyiminə ehtiyac yoxdur. Yalnız snorklinq maskası lazımdır.

Adanın ən ucqar çimərliyi isə Lovinadır.

O, adanın ən şimalında yerləşir. Onu yaxşı çimərlik adlandırmaq çətindir. Amma suyu təmiz, qumu qaradır. sahilə yaxın sularda isə delfinlər üzür.

Burada həmçinin, çimərliyə çıxışı olan və hələ qiymətləri nisbətən ucuz olan istirahət mərkəzləri də var.

Lovinaya gedən yol adanın ürəyi olan Bratan gölündən, düyü terrasları və şəlalələrdən keçir. Bütün bunları xətrinə bura gəlməyə dəyər.

Ümumiyyətlə, hesab edirəm ki, hər bir insan ömründə bir dəfə də olsa, Baliyə səyahət etməlidir.