Argentina məhkəməsi Sandra adlı dişi oranqutanq üçün insan haqlarını, xüsusilə də azadlıq hüququnu qəbul edib. Sandranın həyatının 20 ilini keçirdiyi Buenos-Ayres zooparkında saxlanılması qanundan kənar hesab edilib. Əgər zooparkın işçiləri 10 gün ərzində apelyasiya ilə müraciət etməsələr, o, daha azad olacağı Braziliya qoruğuna buraxılacaq. 

Məhkəmə işinin təşəbbüskarları Argentinanın AFADA təşkilatında çalışan heyvan müdafiəçiləri olublar. Sandranın azad edilməsinə nail olmaq üçün hüquqşünaslar sübut etməyə çalışıblar ki, Sandra bioloji yox, fəlsəfi anlamda şəxsiyyətdir. Hələ keçən ilin noyabr ayında onlar "idrak qabiliyyətli heyvanın tutlması" barəsində şikayətlə müraciət etmişdilər. Hakimlər bir neçə dəfə xahişi rədd ediblər. Sonra isə qəbul etdilər li, insanabənzər primat Sandra qanunsuz olaraq azadlıqdan məhrum edilmişdir.

Heyvanın vəkillərindən olan Paul Buompadrenin dediyinə görə, baş vermiş hadisə nəinki qalan primatlar, hətta qanunsuz olaraq zooparklarda, sirklərdə, akvaparklarda və elmi laboratoriyalarında saxlanılan bütün heyvanlar üçün də yol açacaqdır.

Bizə isə balaca qardaşlarımızın hansı addım atacağını düşünmək qalır. Karyera arxasınca qaçan bir  vəkilin müsahibəsini təsəvvür edin: "Mənim müştərim olan donuz Berti Haaqa məhkəməsinə ərizə vermişdir. Buna səbəb - donuzların insanlardan cəmi 2 genlə fərqlənməsidir. Deməli, donuzlar üçün 98% insan hüquqları qəbul olunmalıdır. Bu, ədalətlidir".