Azərbaycanın əməkdar elm xadimi Zərifə Salahovanın yaratdığı Miniatür Kitab Muzeyi Ginnesin rekordlar kitabına düşüb. Bildirilir ki, Ginnesin Rekordlar Kitabının komandasından muzeyin, dünyanın ən böyük miniatür kitab kolleksiyası elan olunduğu haqda məlumat gəlib. Bu yaxınlarda Z.Salahovaya muzeyin Ginnesin Rekordlar Kitabına salındığını təsdiq edən "Guinness World Records" sertifikatı da təqdim olunacaq. Qeyd olunur ki, muzeydə ümumilikdə dünyanın 66 ölkəsində dərc olunmuş 5600 miniatür kitab toplanmışdır. Muzeyin ekspozisiyasından 2913 kitab nümunəsi  Rekordlar Kitabının tələblərinə cavab vermişdir. Muzeyin ən nadir eksponatları arasında  ölçüləri 0,75х0,75 mm-dən 2х2 mm-ə qədər olan Yaponiyada istehsal olunmuş 4 mikrokitab, həmçinin, 2,0x2,9 mm və 3,5x3,5 mm formatda olan Almaniyanın kitabları vardır. Muzeydə dini tərkibli miniatür kitablar, həmçinin, azərbaycan və xarici klassiklərin əsərləri də toplanmışdır.

via azertag.az