Rusiyanın “Mənim planetim” telekanalında “Həyat deyil, bayramdır” verlişinin yaradıcısı və aparıcısı Olqa Maltseva URBANa stereotiplər, uçan maşınlar haqda danışaraq, ən çox nə üçün darıxacağını boynuna alıb.

 Boynunuza alın, ölkəmiz sizi çox heyrətləndirdi?

 Sözün düzü, Azərbaycana səfər məni bir az qorxudurdu. Kişi enerjisinin nəzərə çarpdığı şərq ölkəsi, tanışlarımın azərbaycanlıların qızğın təbiəti haqında dediklər, qara rəngli geyimə olan məhəbbət, içində ətdən başqa heç nə olmayan menyu... Mən anlayıram ki, səthi sözlərdən nəticə çıxarmaq doğru deyil, amma yenə də qəlbimin dərinliklərində bir ehtiyat var idi.

 Və belə fikirlərlə siz Azərbaycana düşürsüz...

 Bəli. Bax belə fikirlərlə biz Bakıya...gələcəyin şəhərinə düşürük! Bunu başqa cür adlandırmaq olmaz. Elə inşaat qəribəlikləri. Bu yaxınlarda Dubayda oldum və oxşar bir şey hiss etdim. Mədəni şok. Ancaq ora üçün bu, gözlənilən hal idi.Azərbaycan isə sürprizli qutu kimidir! Yeri gəlmişkən, sizin London keblərinizə bircə uçan maşınlar çatışmır (“Beşinci element” yadınızdadı?) ki, uçan boşqabları xatırladan binaları olan gələcək şəhərinin mənzərəsi tamlansın.Təəssüf ki, biz Bakıda çox olmadıq. Filmimiz Göyçay şəhərində başlamalı idi. Biz axı Nar bayramına gəlmişdik. Ona görə də çəkiliş qrupumuz rahat mini-avtobusa əyləşib, Xəzərdən və sivilizasiyadan uzaqlaşdı.

 Yəqin ki, regionlarımız sizi paytaxtımızdan az təəccübləndirmədi.

 Azərbaycanlılar, sizin necə də gözəl təbiətiniz var! Dağlar, çöllər, nar bağları! Bir gün ərzində özünü “12 fəsil” nağılının qəhrəmanı kimi hiss etmək imkanı nəyə desən dəyər. Sizin bu iqlim qurşaqlarınız! 24 saat ərzində biz yay günəşi, yaz yağışı, payız dumanı və hətta qar yığınları gördük. Bu inanılmazdır!

Və budur, ilk çəkilişlərdən biri. Göyçay bazarı. Əvvəlcə mən özümü tam rahat hiss etmirdim. Birincisi, bazarda qadın çox azdır, demək olar hamısı kişilərdi. Özüdə bütün kişilər qara geyimdədirlər. Bu rəng heç vaxt mənim təxəyyülümə optimizm əlavə etməyib. Maraqlısı budur ki, sən mənfi fikirləri beynindən atan kimi, dünya ağ-qara olmaqdan əl çəkir. Artıq kimsə sənə gül dəstəsi kimi cəfəri dəstəsi, yaqut kimi nar, xurma və təbəssüm, təbəssüm, təbəssüm hədiyə edir! Ordaca kimsə masa qoyaraq, çəkiliş qrupumuzu isti çaya qonaq edir. Azərbaycanlılar inanılmaz dərəcədə açıq qəlbli və qonaqpərvər millətdir.

Bəs niyə bazarda qadın azdır? Ona görə ki (bunu mənə sonradan qadınlar izah etdilər), kişilər özləri bazara gedirlər. Gözəl xanımlarını ağır işdən qoruyurlar. Bunu eşitmək hədsiz dərəcədə xoşdur.

Umidvaram, bizim zəngin mətbəximizlə tanış olaraq, bütün öncəki fikirlərinizdən vaz keçdiz...

 Azərbaycanın qonaqpərvər və uzun-uzadı qonaqlıqları nəyə desən dəyər! Məlum oldu ki, azərbaycan mətbəxində ətdən başqa dadlı yeməklər də çox imiş. Litrlərlə içmək istədiyim ən dadlı ayran, keçi pendiri! Göyərtiniz necə gözəldir! O qədər təravətli və ətirlidir ki, onu dəstələrlə, tonlarla yemək olar. Təzə və çox dadlı balıq... Mmm...Və əlbəttə ki, narşarab! Nar krallığında onsuz olarmı?

Nar bayramı, yəqin ki, sizi meyvələrin müxtəlifliyi ilə heyran etdi.

Narlara qalsa, mənim təsəvvürümdə əsl nar dənələrindən partlayış baş vermişdi. Mən heç ağlıma da gətirməzdim ki, nar bu qədər dadlı, müxtəlif, konfet kimi şirin, ətirli ola bilər. Sizə daha artığını deyim, çoxlarımız narı təmizləməyi belə bacarmırıq. Eşələnib-eşələnib, atırıq. Amma Azərbaycana səyahətdən sonra narsız yaşamaq mümkün deyil...Düzdü, bizim bazarlardan alınan narların heç biri göyçay narına çata bilməz! Ona görə də, tez olun, onları Moskvaya gətirin...Xüsusilə də bal kimi şirin, şirəli, sarı nar üçün darıxıram... Mmm...

Yenə də, Azərbaycan haqqında ən parlaq təəssüratınız hansıdır?

Ən parlaq təəssürat odur ki, özünü sanki böyük bir ailənin üzvi kimi hiss edirsən. Azərbaycan qollarını açaraq, bizi qəbul elədi. Bunda qəlbimizdə isti və işıqlı hisslər oyandı. Başqa cür ola da bilməzdi. Axı planetimizdə yaşayan insanların hamısı böyük bir ailədir. Bunu həmişə xatırlamaq lazımdır!

Evinizə sevgi və əminamanlıq arzulayıram! Vəssalam. Bizim nar əhvalatlarımızı “Россия 1” və “Моя планета” kanallarında izləyin.