Bizə elə gəlir ki, hər zaman gözəl görünmək olmaz və təəssüf ki, bu çox zaman belə olur. İnsan orqanizminin ən böyük orqanı olan dəri bütün ömrümüz boyu var gücü ilə fəaliyyət göstərir. Bu fəaliyyət nəticəsində isə dərinin reparativ qabiliyyəti, yəni yenilöənmə funksiyası aşağı enir: sıxlığı və elastikliyi azalır, xırda qırışlar əmələ gəlir. 

Üz dərisinə qayğı ilə yanaşmaq, düzgün prosüdurlar seçmək çox vacibdir. Qadınlar üçün ən lazımlı və mümkün əməliyyatlardan biri pilinqdir. Pilinqin bu və ya digər növünün seçilməsində isə dərinin tipi, keyfiyyəti, qalınlığı, həmçinin yaşı əhəmiyyət kəsb edir. 

Qəribə də səslənsə, bəzi qadınlar gğzəlliyə çatmaq üçün mürəkkəb pilinq prosedurunun əvəzinə daha asan, amma səhv və ən əsası, təhlükəli alternativlərə əl atırlar. Gəlin, birlikdə əsas məqsədimiz - dərinin cavanlığının qorunması yolunu addım-addım keçək.

Ən sadə anlayışlardan başlayaq. Pilinq nə deməkdir? Bu, dərinin mərhələli, idarə olunan zədələnməsi prosesidir. Diqqətinizi məhz "idarə olunan" ifadəsinə yönəltmək istəyirəm. Belə ki, əməliyyatın aparılması və dərinin yenilənməsi prosesi savadlı mütəxəssis tərəfindən idarə olunmalıdır.

Yayılmış fikirlərə baxmayaq, pilinqin birdəfəlik prosedur olduğu yanılmanı təkzib etmək istərdim. Pilinq mərhələlərlə keçirilir. Bir qayda olaraq, əsas prosedurdan öncə dərinin piliqə hazırlamaq lazımdır ki, bu 2-3 mərhələdə həyata keçirilir. Bu, demək olar ki, uğurlu pilinqin yarısı deməkdir. Çünki hazırlanmış dəri pilinqə daha tez reaksiya verir, dəri təbəqəsinin yenilənməsi dahah tez başlayır və tez bir zamanda da tamamlanır. 

Bu prosedurla yanaşı, ağır formalı aknelərin müalicəsi zamanı istifadə olunan roakkutan preparatının tətbiqi də aktualdır. Lakin, bəzi kosmetoloqlar üzərilərinə məsuliyyət götürüb, bu preparatı daha yüngül patologiyalar zamanı, bəzən isə dəri relyefinin korreksiyası məqsədilə də təyin edirlər.

Əslində, roakkutan - uşaq dünyaya gətirməyi planlaşdıran, şəkərli diabetdən və qara ciyər çatmamazlığından əziyyət çəkən, A vitamini qəbul edən və depressiyaya meyilli qadıənlara qəti qadağan olunmuş preparatdır. Bundan başqa, preparatın minimal reabilitasiya dövrü 6 aydır. Bu 6 ay ərzində qadın ultrabənövşəyi şüalanmaya məruz qalmamalı, lazır prosedurlarından istifadə etməməlidir.

Kosmetoloqlar tərəfindən bu xırdalıqlara əhəmiyyət verilməməsi, elementar təhlükəsizlik qaydalarında əməl edilməməsi (xəstənin anamnezinin toplanılması, lazımi müayinələrin keçirilməsi) acınacaqlı və dönülməz nəticələrə gətirib çıxarda bilər.

Yuxarıda deyilərdən məlum olur ki, uzun, lakin təhlükəsiz pilinq metodunun seçilməsi daha məsləhətlidir. Nəticədə isə dərimiz xırda qırışlardan azad olmuş, daha parlaq və hamar, sağlam və gənc görüntü əldə edəcək və bu bizim sağlamlığımız üçün tamamilə zərərsiz olacaq. Buna nail olmaq üçün isə dərinin yenilənməsi prosesinə ciddi və düzgün yanaşmaq lazımdır.

Geniş məqaləmin birinci hissəsinin sonunda isə demək istəyirəm ki, bizim dərimiz daha çox qayğıya və diqqətə layiqdir. Odur ki, dərinizə qulluq edin, onu faydalı prosedurlarla sevindirin. Axı o buna layiqdir.