90-cı illərin ən yaxşı komiklərindən biri olan Cim Kerri öz mimikası ilə insanı heyrətləndirməyə davam edir. Karyerası komediya üzərində qurulmuş əksər aktyorlar kimi, Kerri də ilk zamanlar özünü dramatik ampluada sınamaq qərarına gəlmişdi. Onun bu istiqamətdəki ilk işləri həqiqətən də, uğurlu idi.

Cim Yucin Kerri 17 yanvar 1962-ci ildə anadan olub. Səhnədə çıxış etməyə 15 yaşından başlayıb. Bir neçə ildən sonra isə o, artıq Los-Ancelesdə yumoristik şouda çıxış edirdi, lakin şou bağlanır və Kerri iki illik depressiyaya düşür.

O, müxtəlif sketç-şoularda çıxış edir, bu tipli televiziya proqramlarında çəkilir, orda-burda epizodik rollar alırdı. Lakin səbr və hövsələ aktyora xas xüsusiyyət deyildi. Nəhayət Kerri "Eys Ventura: ev heyvanlarının axtarışı" filmində çəkilməyə başlayanda, onun bütün zəhmətləri mükafatlandırılır. Lakin, birmənalı deyil. Bir tərəfdən, az büdcəli film 100 mln gəlir gətirir və Kerrini böyük ekrana çıxarır. Başqa bir tərəfdən isə, film kino tənqidçiləri tərəfindən bəyənilmir və aktyor "Qızıl moruq" mükafatına layiq görülür. 

Düşünürəm ki, bu mükafat aktyoru daha da həvəsləndirir və artıq bir ildən sonra onun ən yadda qalan filmlərindən olan "The Mask" və "Dumb and Dumber" filmləri işıq üzü görür. Sonra isə "Batman Forever", "The cable guy", "Liar Liar" filmləri ekrana çıxır.

Son illərdə aktyorun bəxti gətirmir. Nə edə bilərik, bu, Cim Kerridir. O, daima axtarışdadır.