İllər keçir, moda dəyişir, qlobal istiləşmənin fəsadları üzə çıxır, meşələr qırılır, internet narkotikləri əvəz edir, bakı qızları da müasirləşir, cazibədar əclaflara vurulmağa, onlardan ötrü dərd çəkməyə davam edirlər. Əgər alimlər Mona Lİzanın təbəssümünün sirrini açmağın bir addımlığında olsalar da, qızların daxili aləmi onlar üçün sirr olaraq qalmaqdadır.

Bu aşıq quşcığazların ətrafında hər zaman saysız-hesabsız cəngavərlər fırlanır. Onlar sevdikləri qıza görə göydən ulduz da gətirməyə hazırdırlar, ofisə "lyuks" nahar sifariş etməyə də, qız manqa həvəskarıdırsa, lap yapon dili kurslarına yazılmağa da.

Bəs qız nə edir? Cəngavərin gətirdiyi şokoladı çeynəyərək, hansısa əclafın dərdində ağlamağa davam edir. Problem bundadır ki, qızlar sirrli əhvalatları çox sevirlər. Əclaf kişidən sirli nə ola bilər axı? O kobuddu, üzlüdü, şəxsi azadlığını hər şeydən üstün tutur. Bu da onun təbiətidir. Əslində, belə kişi əvvəlcədən özü haqda həqiqəti deyir. Lakin onlarla romantik kitab oxumuş Aysel ümid edir ki, Ceyn Eyr kimi, əsl sevgi ilə mister Roşesterini dəyişdirə bilər.

Lakin bu belə deyil. Demirəm ki, həyatda belə şeylər olmur. Amma daha çox hallarda mister Roşesterlərin nə bədbəxt sevgi hekayəsi, nə dəhşətli ailə problemləri, nə də "aşiq olmaqdan qorxu" deyilən xəstəlikləri olmur. Onları qızlar özləri uydururlar. 

Sizə bir neçə həyatı hadisə nağıl edəcəm. Bəlkə, nə vaxtsa, köməyinizə gələr.

Əhvalat №1:

Çox yaxın rəfiqəmin bir əclaf nişanlısı var idi. Özü də oğlanın əclaf olduğu haqda hamı bilirdi, qız özü də. Amma, buna baxmayaraq, sevirdi və ümid edirdi. İki il onlar nişanlı olduqları müddətdə oğlan evliliyə hazır olmadığını bildirirdi. İşləyib, gələcəyini qurmaq istəyirdi. Sabrina da buna etiraz etmirdi. Özü bizneslə məşğul olur, layihələr fikirləşir, öz üzərində çalışır, nişanlısını həvəsləndirirdi. Amma bir məsələ var idi...Turalla nişanlanan zaman Sabrina daha bir bonus əldə etdi - aldadılmalar. Yəqin ki, iş yerində elə qız yox idi ki, Tural ona yaxınlaşmasın. Onun üzlülülüyü iyrənc səviyyəsinə çatırdı. Əsas da o idi ki, onlar bir yerdə işləyirdilər. Bu "Santa Barbaranı" bütün ətraf maraqla seyr edirdi. Əlbəttə ki, hamı Sabrinanın başına ağıl qoymağa çalışırdı. Yəqin ki, onun gözlərini həqiqətə açan əsas səbəb mən oldum. Bu dram bir həftə davam edirdi. yeri gəlmişkən, bir sürü qız bizə yaxınlaşıb, Turalın onlara yumşaq desək, "göz-qaş" elədiyini bildirirdi. 

Sabrina nişanı qaytarandan sonra isə Tural bir iş yoldaşı ilə evləndi. Odur ki, əziz qızlar, əgər oğlan sizə deyirsə: "Mən hələ evlililə və ciddi münasibətlərə hazır deyiləm" bu o deməkdir ki, o bütün bunlara məhz sizinlə hazır deyil. 

p.s. Sabrina indi çox xoşbəxtdir. Yaşayır və həyatdan həzz alır. Gözəl cəngavərlərdən biri isə onun qəlbini fəth eləməyə çalışır.

Əhvalat №2: 

Leyla adlı başqa bir rəfiqəm "arzularının kişisi" ilə təsadüfən görüşüb. Əvvəlcə o ümumiyyətlə deyirdi ki, oğlam onun zövqündə deyil. Sonra isə nə isə baş verdi və o, aşiq oldu. Özü də bunu boynuna almaq istəmirdi.

Onların "münasibətləri" də iki il davam edirdi. Məsələ burasında idi ki, oğlan Leylanın mövcudluğunu hamıdan gizlədirdi. Yəni, onlar həmiş bir yerdə idilər, amma sadəcə, tanış olaraq. Anlamaq olar ki, tanışlığın ilk jəftələrində insanlar hisslərindən əmin olmurlar, mümkün münasibətlər haaqda danışmağa tələsmirlər. Amma iki il yox da. Yeri gəlmişkən, Vüsalın da bonusu var idi - keçmiş sevgilisi.

O, Vüsala zəng edir, sms-lər yazırdı. Vüsal da cavab verirdi. Sonra isə üzündə bir əzab ifadəsi ilə Leylaya deyirdi ki, keçmiş sevgilisi ilə münasibətlərə qəflətən son qoya bilməz. Əksər qızlardan fərqli olaraq, Leyla bu məsələni qabartmırdı və hətta onun alicənablığı ilə qürur duyurdu. Amma zənglər getdikcə artırdı və Vüsal daha da qıcıqlanaraq, ona zaman tanımasını xahiş edirdi. Bu, artıq uzun müddət davam edirdi. Vüsal periodik olaraq yoxa çıxır, sonra qayıdaraq üzr istəyirdi. Leyla da onu bağışlayırdı. lakin bu nə qədər davam edə bilərdi? Qərar qəbul etmək çətin idi, amma leyla bu qərarı verdi və Vüsaldan ayrıldı. O da qayıtdı. Düzdü, Leylanın yanına deyil, dəfələrlə arxasınca danışdığı keçmiş sevgilisinin yanına. Əsas isə odur ki, Leyla da ona lazım olan insana rast gəldi və həqiqətən sevilməyin də demək olduğunu anladı. Mütəmade olaraq, Vüsal Leylanı geri qaytarmağa çalışır, amma əsl xoşbəxtliyin dadını bilən Leyla artıq anlayır ki, 30 yaşında, qeyri-müəyyənliklər içində itib-batmış uşaqdan artığına layiqdir.

Bu hadisədən çıxardığımız nəticə: əgər kişi sizin münasibətlərinizi iki aydan çox gizlədirsə, deməli o sizi hər zaman gizləyəcək. Nə qədər ki, ona başlanmamısınız, qaçın.

Mən heç bir halda demək istəmirəm ki, əclaflıq yalnız kişilərə xas xüsusiyyətdir. Belə qızların da sayı-hesabı yoxdur. Amma rəfiqələrimlə bərabər, mən də bu əhvalarları yaşayırdım. İnsanları dəyişdirməyə çalışmayın. Siz ya onların sizə olan münasibətini qəbul edirsiniz, ya yox. Sizin kişinizin xüsusi bir insan olduğu haqda fikirlərlə özünüzə ümidlər verməyin. Onun kobudluğu və hörmətsizliyinin sizin gələcək münasibətləriniz üçün prelüdiya olduğu da yalandır. Özünüzü aldatmayın və aldanmayın. Həqiqi münasibətlərdə mənəvi sadizmə yer yoxdur.

p.s. Öz adımdan əlavə etmək istərdim ki, [email protected] ünvanıma sizin insanlarla münasibətləriniz və əhvalatlarınız barədə anonim məktublarınızı almağa şad olaram. Hər şənbə onları cavablandıracam.