Ağacların məhv edilməsinin şahidi olsaydınız nə edərdiniz? Azərbaycanda bu sahədə müraciət edə biləcəyiniz “qaynar xətt” fəaliyyət göstərir.
Əgər siz ağacların qəsdən məhv edilməsinə şahid olmusunuzsa, o zaman 168 sayli qaynar xəttə zəng edib müraciət edə bilərsiniz.
Bu həftə AR Ekologiya və Təbii Sərvətlər Nazirliyinin 168 saylı qaynar xəttinə zəng daxil olmuşdur. Paytaxtın Xətai rayonu İnqilab İsmayılov küçəsi ev 6-nın sakinləri ağacların qanunsuz kəsilməsilə əlaqədar qaynar xəttə müraciət etmişlər. İlkin baxış zamanı məlum olmuşdur ki, naməlum şəxslər diametri 12-40 sm olan 6 ağacın dibinə dizel yanacağı tökərək, onların qurudulmasına nail olmaq istəmişlər. Hal-hazırda Xətai rayon polis bölməsinin əməkdaşları cinayətkarların axtarılması üzrə ilkin istintaq işlərinə başlamışlar.
Həyətdə iki ağac baltalayan Abbas Hüseynov isə cəzasına çatmışdır. 20 yanvar küçəsi 24-ün sakinləri 168 sayli “qaynar xəttə” müraciət edərək həyətdəki ağacların kəsilməsi barədə məlumat vermişlər. AR Ekologiya və Təbii Sərvətlər Nazirliyinin əməkdaşlarının araşdırmaları nəticəsində, Azərbaycan Respublikasının İnzibati Xətalar Məcəlləsinə əsasən, Abbas Hüseynov 2900 manat məbləğində cərimə olunmuşdur.
Azərbaycan Respublikasının İnzibati Xətalar Məcəlləsi
Maddə 92. Meşəqırma bileti (orderi) olmadan köküstə yaş ağacların və kolların qanunsuz kəsilməsi və zədələnməsi, meşə bitkilərinin və cavan ağacların məhv edilməsi və zədələnməsi
92.1. Meşəqırma bileti (orderi) olmadan meşə fondunda köküstə yaş ağacların və kolların qanunsuz kəsilməsinə və ya onların zədələnməsinə və ya meşə əkinlərində, tingliklərində, böyümə və plantasiya sahələrində toxmacarların və tinglərin, yaxud meşənin bərpa edilməsi üçün müəyyən olunmuş sahələrdə təbii əmələ gəlmiş cavan ağacların və cücərtilərin məhv edilməsinə və ya zədələnməsinə görə—
* fiziki şəxslər yeddi yüz manatdan min manatadək miqdarda, vəzifəli şəxslər dörd min beş yüz manatdan beş min manatadək miqdarda cərimə edilir.
92.2. Meşə fonduna aid olmayan ağac və ya kol əkililərinin zədələnməsinə, kəsilməsinə və ya məhv edilməsinə görə —
* fiziki şəxslər iki min iki yüz manatdan iki min beş yüz manatadək miqdarda, vəzifəli şəxslər doqquz yüz manatdan on min manatadək miqdarda, hüquqi şəxslər qırx min manatdan əlli min manatadək miqdarda cərimə edilir.
