Bu günkü müsahibimlə mən düz 14 il bundan əvvəl sosial həyatdakı aktivliyim zamanı ortaq dostlarımın sayəsində tanış olmuşdum, həm çox səmimi, mehriban, ədalətli, fədakar, mədəni, həm qəlbitəmiz, mülayim, həm də ictimai, sosial, siyasi aktiv, çalışqan, əməksevər insandır. Çox maraqlı, öz düşüncə və baxışları olan diplomatik insandır, məsləhət verər lazım olanda, kiminsə xətrinə dəyməz, dəymək istəməz O! Çünki özünə rəva bilmədiyini, başqasına rəva bilməz. 14 ildir dostuq, səmimi, xətrimi istəyən dostum, məni yeri gələndə danlayan, tənqid edən, yeri gələndə isə tərifləyən... Ətimi yesə də, sümüyümü atmaz heç zaman! O, mənim dostum və bu il Milli Məclisə Millət Vəkilliyinə namizəd olan Çingiz Bayramovdur.

Layihəmin şərtlərinə və ideyama xəyanət etmədən başlayıram müsahibəmi.

Çingiz müəllim, bilirəm ki, seçkiqabağı təşviqat və digər tədbirlər, eləcə də ictimai birliyinizin işləri ilə bağlı boş vaxtınız az olur, buna baxmayaraq, mənə vaxt ayırdığınıza və səmimi ünsiyyətə görə Sizə öz dərin minnətdarlığımı bildirirəm.

• Sizin üçün Çingiz Bayramov kimdir?

Mənim üçün Çingiz Bayramov özünü, həyatını, bütün fəaliyyətini Azərbaycan xalqının uğuru, Azərbaycan gəncliyinin inkişafı üçün həsr edən adi bir Azərbaycan vətəndaşıdır.

Tovuz rayonunda müəllim, ziyalı ailəsində anadan olmuşam. Ali təhsilimi Türkiyə Respublikasının İstanbul Universitetinin Siyasi Elmlər Fakültəsini Dövlət İdarəçiliyi ixtisası üzrə bitirmişəm. Dövlət Torpaq və Xəritəçəkmə Komitəsinin Mətbuat Xidməti və Analitik İnformasiya sektorunda böyuk məsləhətçi, “Azərsu” Səhmdar Cəmiyyətində Baş mütəxəssis və bir özəl şirkətdə baş müşavir vəzifələrində işləmişəm. Hal-hazırda “Türkiyə Universitetləri Məzunları” İctimai Birliyinin (TUMİB) sədri və eyni zamanda Azərbaycan Milli QHT Forumunun (MQF) İdarə Heyətinin üzvüyəm.

• Çingiz adının mənası “dəniz, okean”, "böyük, nəhəng, güclü, yorulmaz”, "səmalar oğlu" kimi anlamları verir, bu mənalardan hansı daha çox Sizə aiddir?

Bu mənalardan ən çox “yorulmaz” anlamı mənə uyğundur, çünki Azərbaycan gəncliyinin uğurlu gələcəyi yolunda ictimai işlərdə çalışdığım zaman qətiyyən yorğunluq duyğusu yaşamıram. Həm də “dəniz, okean” mənasını özümə yaxın görürəm. İctimai işlərdə çalışarkən, millətimə xidmət edərkən ruhumun dəniz kimi dalğalandığını hiss edirəm.

• Rəsmi olaraq Çingiz Bayramov kimdir?

Hələ Türkiyədəki tələbəlik illərimdə İstanbul şəhərində ali təhsil alan azərbaycanlı tələbələrin ilk tələbə təmsilçisi seçilmişəm. İctimai işlərə marağım sayəsində “TUMİB” təşkilatının rəhbəri kimi yüzlərlə yerli və xarici tədbirin, konfransın təşkilatçısı və nümayəndəsi, milli və mənəvi dəyərləri, azərbaycançılığı, tolerantlığı, Azərbaycan – Türkiyə qardaşlığını, Türk dünyasını təbliğ edən çoxsaylı layihələrin müəllifi olmuşam.  Azərbaycanın ictimai-siyasi həyatında daha aktiv rol oynamaq, millətimə daha yaxşı xidmət edə bilmək üçün 2005-ci ildə 22 saylı Nəsimi rayonu II seçki dairəsindən Azərbaycan Respublikasının Milli Məclisinə deputatlığa namizəd olmuşam. Hal-hazırda da 16 saylı Yasamal II seçki dairəsindən deputatlığa namizədəm.

• Sizin üçün uğur düsturunun elementləri nədir?

Mənim üçün uğur düsturunun elementləri – özünə inam, çalışmaq və gələcəyə ümidlə baxmaqdır.

• “Qızıl orta, hər şey və ya heç nə” prinsiplərindən hansını seçirsiniz? Məncə ictimai-siyasi, ya da şəxsi həyatda “ya hər şey, ya da heç nə” prinsipi doğru deyil, həyatı “qızıl orta” prinsipi üzərində qurmaq lazımdır.
• Sizcə təsadüflər zəruriyyətdən doğurmu? Həyat bir zərurətlər axımıdır, hətta təsadüf kimi görünənlər də öz başlanğıcını zərurətlərdən götürür.
• Həyat bir məktəbdir, bu məktəb sizə hansı dərsləri keçib?

  Həyat məktəbi mənə öz varlığımı millətimin uğurlu gələcəyi yolunda həsr etməyi və bu işdə sonadək mübarizə ruhunu aşılayıb.

• Həyat bir məktəbdir, bu məktəb sizə hansı dərsləri keçib?  

  Mənim üçün ən uğurlu sərmayə elm və öz biliyini millətin yolunda sərf etməyə hazır olan insan potensialıdır.

•  Sizin üçün əsl dost kimdir? Əsl dost –xoş günün dostudur, ya dar günün?

  Məncə əsl dost həm dar gündə, həm də xoş gündə dostunun yanında olan kəsdir.

• İndiki gəncləri təsvir edin və onlara nə kimi tövsiyələriniz vardır? 

  İndiki gənclər sanki əyləncəyə daha çox düşkündürlər, öz gənclik enerjilərini elm, mədəniyyət, ictimai işlərdən çox şəxsi zövqlərə sərf etməyi sevirlər. Onlara bu güclü enerjilərini öz bilik və savadlarını artırmaq, millətimizin xoş gələcəyi, inkişafı yolunda çalışaraq sərf etmələrini arzulayıram.

• Gerçəkləşməyən uşaqlıq arzunuz varmı?  

  Bütöv Azərbaycan arzusu, işğal edilmiş torpaqlarımızın azad edilməsinin gerçəkləşməsinin həsrətindəyəm.

• Müsahibəyə razılıq verdiyiniz üçün təşəkkür edirəm.

  Məndən müsahibə götürdüyünüz üçün mən sizə təşəkkür edirəm.

  Müsahibəni götürdü: Günel Fərhadqızı