Londonun meri Boris Conson Temza üzərində salınacaq 366 metrlik bağ-körpünün layihəsini təsdiqləyib. Piyada keçidi şəhərin mərkəzindəki Templ və çayın cənub sahilindəki Saut Benk rayonlarını birləşdirəcək.

İdeyanın təşəbbüskarı britaniyalı aktrisa Coanna Lamli olmuşdur. Dizaynın müəllifi kimi isə 2012-ci ildə London Olimpiya Oyunları zamanı Olimpik badənin yaradıcısı Tomas Xezervik çıxış etmişdir. Körpünün yaşıllaşdırılması layihəsini landşaft dizayneri Den Pirson hazırlamışdır. O, körpünün üzərində 270 ağac və çoxlu sayda kol, sarmaşıq, canlı hasar və çiçək əkməyi təklif edir.

Tikinti artıq gələn il başlaya bilər. Körpünün ildə 7 milyon dəfə keçiləcəyi gözlənilir.

Bağ-körpünün tikintisi adi körpüdən baha başa gələcək, 60 mln. funt təşkil edəcəkdir.

Belə bir bağın Bakı buxtasının üzərində salınacağını təsəvvür edə bilərsinizmi?