Təqribən bir il əvvəl Bakı metrosunun sərnişinləri stansiyaların satıcılardan təmizlənməsi xəbərinə inana bilmirdilər. Rahat nəfəs almağa macal tapmamış, metroların yeraltı keçidlərində yenə də ticarət obyektlərinin açılacağı xəbəri yayılmağa başladı. "Bakı Metropoliteni" QSC-nin mətbuat xidmətinin başçısı Nəsimi Paşayevin sözlərinə görə, mertopolitenin ərazisində sərnişinlərin hərəkətinə mane olmayan zonalarda ticarət obyektlərinin açılmasına icazə veriləcəkdir. Bu zaman belə bir sual meydana  çıxır: görəsən ticarət obyektləri tavana yerləşdiriləcək və satıcılar spaydermenə dönüşəcəklər? Daha bir moment - yeni quraşdırılacaq ticarət obyektlərində yalnız kitab, çiçək  satılacaq və apteklər fəaliyyət göstərəcəkdir. Bunlar hamısı, əlbəttə ki, gözəldir, amma zənnimcə, sərnişin üçün piştaxtaya ətirli güllərin, yoxsa balığın düzülməsinin heç bir fərqi yoxdur. Onları maraqlandıran - lazımi ünvana vaxtında çatmalarıdır. Həmçinin N. Paşayev bildirib ki, ticarət obyektləri bütün metro keçidlərində olmayacaq. Hal-hazırda "Koroğlu" və bir neçə başqa stansiyada ticarət nöqtələrinin açılması haqqında danışıqlar aparılır. Xatırladaq ki, keçən il qoyulan qadağaya baxmayaraq, bəzi metro keçidlərində bu günə qədər də ticarət davavm edir və bu, sərnişinlərin hərəkətinə xeyli mane olur. Beləliklə, problemin kökündən həlli yenə də baş tutmadı. Biz isə sərnişinlərə heyfslənməməyi və möcüzələrə inanmağı məsləhət görürük.