Mən əminəm ki, ətrafımızdakı bayramı biz özümüz yaradırıq. İstənilən günü bayrama çevirmək, kiçik bir möcüzə yaratmaq və kiməsə təbəssüm bəxş etmək mümkündür.

Möcüzə deyəndə ən möcüzəli bayram olan Yeni İli xatırlamamaq mümkün deyil. İnanıram ki, həqiqətən inanan və qəlbində arzu tutan insanların arzusu mütləq həyata keçir. 

Beləliklə, hər ilin dekabr ayında mən yeni İl və Milad haqqında bir sürü köhnə filmə baxıb, otağımı küknar budaqları, şamlar, yolka oyuncaqları və işıqlarla bəzəməyə başlayıram. 

Sonra isə evin ab-havası və portağal ətrindən ilhamlanaraq, əlimdə bir fincan çay rahat əyləşib, balaca sehir, yəni hədiyyə bəxş etmək istədiyim insanların siyahısını tutmağa başlayıram.

Bu gün biz məhz hədiyyələrdən danışacağıq. Sevdiklərimizə nə hədiyyə edə bilərik və hədiyyələri harda axtaraq?

1. Təbii daşlar. Mən özüm təbii daşlardan hazırlanmış asmaları, bilərzikləri, üzükləri həvəslə alır və gəzdirirəm. Rəfiqələrimin reaksiyasından onlardan hansına təbii daşlardan hazırlanan talismanlar və bəzək əşyalarını hədiyyə edə biləcəyimi artıq bilirəm. "Aqat" mağazasına getməyi məsləhət görürəm. Orda hər zövqə uyğun böyük süçim var. Mağazalardan biri "Xəqani" TM-nin içində yerləşir, biri isə Nizami küçəsində, Lavazzanın yan tərəfində. Bilərziklərinqiyməti 3 manatdan başlayır. Cibiniz razı qalacaq :)

2) Süvenirlər. Feysbuk məkanında mən «I love Art Souvenirs» adlı maraqlı bir səhifəyə rast gəldim. Səhifənin albomlarında o qədər gözəl hədiyyəlik ideyalar var ki, gözlərim sayrışdı. Siz əl işi olan incə saç bağları, yumşaq yastıqlar, əlvan keyslər, sevdiyiniz rəsmli fincanlar sifariş edə bilərsiniz. Variant çoxdurş Əsas - dostunuza nəyin daha xoş gələcəyini bilməkdir.

3) Çay. Əgər sizin dostunuz mənim kimi çayxordursa, ona "Unsiya" mağazasından bir neçə npv dadlı çay hədiyyə edin. Kağıza bükülmüş bu ətirli çay yarpaqları ən qəddar insanın da ürəyini əritməyə qadirdir. Əsas məsələ, elə oradanca dadlı konfetlər almağı unutmamaqdır. Belə çayı dəmləyəndə isə bütün ailə üzvləri mətbəxə toplaşaraq, həsrətlə çaynikdəki çiçəkli, quru meyvəli çayın ətrini qoxlayırlar.

4) Kitablar, qeyd kitabçaları, əlfəcinlər. Bəli-bəli, nə qədər banal səslənsə də, bu üç əşya kitab həvəskarları üçün ideal hədiyyələrdir. Mən Akademiya kitab mərkəzindəjn inanılmaz vitrajlı əlfəcinlər aldım. 4 gözəl maqnitli əlfəcin üçün mən 7.50 AZN ödədim. Bundan başqa, sevdiyiniz insan yeni ildən yeni həyata başlamaq qərarına gəlibsə, qeyri-adi qeydiyyat kitabçası yerinə düçən hədiyyə olacaq. Qoy o kitabçaya yalnız xoş xatirələr, uğurl və nailiyyətlər yazılsın. Yeri gəlmişkən, Nizami küçəsinidə keçirilən yarmarkadan mən çox qəşəng bir qeyd kitabçasını cəmi 5 AZN-ə əldə etdim.

5) Dekabrda qlintveyn kimi isti və dadlı nələrsə içmək istəyirsən. Bir şüşə yaxşı qırmızı şərab, məxmər torbacıq, içkinin hazırlanması üçün tələb olunan ədviyyat və otlar alın. Şərab şüşəsini qırmızı kağıza bükün, məxmər torbasının içinə ədviyyatları (darçın, mixək, zəncəfil) doldurub, şüşənin üstündən asın. Ayrıca paketə isə bir neçə portağal yığın. Dadlı və original :)

6) Rahat pijamalar, şallar, toxunma sviterlər. Kəşmir şallar sizi qucaqlayaraq, soyuqdan donmağa qoymaz. Rahat pijamada isə istənilən yuxu şirin olar ^_^

7) Sonda isə sizə ən gözəl hədiyyənin sirrini açmaq istəyirəm. Bu, SEVGİDİR! O heç bir xərc tələb etmir. Gözəgörünməz bir şey olsa da, hiss edilir. Onu hədiyyə edən zaman isə yüz qat artaraq sizə qayıdar. 

Siz də öz hədiyyə ideyalarınızla bölüşün. Və unutmayın ki, səmimi qəlbdən edilmiş istənilən hədiyyə gözəldir.