Bakıda avtomobillərin sayı getdikcə artmaqdadır. Bu isə yeni yol və körpülərin salınması sürətinin artmasını tələb edir. Bu, yollardakı tıxac və avtomobil sıxlığını aradan qaldırmağın ən optimal üsullarından biridir. Yol ayrıcları və körpülərin tikintisi nəinki mərkəzdə, həmçinin, şəhər kənarı üçün də labüddür. 

Belə tikintilərdən biri Bakı-Quba yolunun 17-ci kilometrində, yeni salınan idman kompleksinin yanında başladılıb. Yeni körpü "Bakı-Novxanı-Sumqayıt" yol layihəsinin bir hissəsi olacaq. Körpünün uzunluğu 70, eni isə 20 metr olacaq və o, üç zolaqlı yoldan ibarət olacaq.