Dünən-bu gün-sabah hamımızı böyük bazarlıq gözləyir. Ona görə ki, hamımız olivye, dolma, plov hazırlamalı, şampan açmalı və yeni il hədiyyələrini təqdim etməliyik.
Bayram qonaqlığının ərəfəsində URBAN müstəqil təcrübə keçirib. Evimizin yaxınlığında etdiyimiz bazarlıq bizə nə qədər bahasına başa gəlir? Bəlkə, qiymətləri ucuz olan marketə getmək daha əlverişli olar?
Əvvəlcədən deyim ki, biz ən lazımlı məhsulların qiymətlərini müqayisə etmişik. Məsələn, kolbasa müxtəlif olur və onun qiymətləri də dəyişir. Odur ki, onu siyahımıza daxil etməmişik. Bayram alış-verişi olduğuna görə, dözməyib şampan, portağal və naringini siyahımıza salmaq qərarına gəldik. Ümumilikdə isə, sıravi alıcının əldə etdiyi məhsullara müraciət etmişik. Məsələn, əgər A mağazasında Final günəbaxan yağı B mağazasına nizbətən 20 qəpik bahadırsa, özünüz anlaya bilərsiniz ki, aldığınız Zlato yağı 30-40 qəpik baha olacaq. Əsas məqsəd, hansı mağazada bazarlığın daha əlverişli olduğunu anlamaqdır. Yəni, əgər adi bitki yağının qiymətində fərq 20 qəpikdirsə, daha bahalı məhsullarda bu fərq həndəsi silsilə üzrə artır. Bir-iki mağazada çəki ilə şəkər tozu yox idi. 800 qramlıq qablaşdırmanın qiymətindən irəli gələrək, 1 kq-ın qiymətini hesablamalı olduq.
Araşdırmanı iri şəbəkələrdə və topdan satış mərkəzlərində həyata keçirdik. Beləliklə, biz zənbilimizi götürüb, Bazar Store, Bizim Market, Citimart, Favorit, Fresco, MacroMart, Neptun, Rahat mağazalarına üz tutduq.
Citimart mağazası pis mənada seçilirdi. Belə ki, planlaşdırdığımız səbətimizdəki məhsulların əksəriyyətini biz burada tapmadıq və nəticədə, bu mağaza üçün ümumi zənbilin qiymətini müəyyən edə bilmədik. Amma olan məhsulların qiymətlərinin müqayisəsi kifayət etdi ki, bu mağazanın qiymətlərinin 15-20% baha olması nəticəsinə gələk.
- Topdan satış mağazaları - 59,87 AZN
- Bazar Store - 64 AZN
- MacroMart - 64,65 AZN
- Rahat - 64,99 AZN
- Bizim Market - 65,7 AZN
- Neptun - 65,8 AZN
- Fresco - 66,35 AZN
- Favorit - 70,52 AZN
Beləliklə, ən ucuz supermarket - BazarStore - və ən bahalı - Favorit -arsında fərq - 10% təşkil etdi. Topdan satış mağazalarında isə məhsullar 20% ucuz oldu. Ona görə də, hər birimizə ən azı 200 manata başa gələcək bayram bazarlığına yollanmazdan öncə, hansı yazılı mağazaya daxil olacağınızı əvvəlcədən fikirləşin. Elə gündəlik bazarlıq zamanı da bu qaydaya əməl etsəniz, pis olmaz.
Sizə uğurlu alış-veriş və şən Yeni İL arzulayırıq!
Cədvələ tıklayarkən başqa səhifədə iri ölçüdə açılacaq.
