URBAN.AZ
URBAN.AZ

Telegram Banner

Fikir vermisiniz ki, müxtəlif yanacaqdoldurma məntəqələrində eyni məbləğə fərqli miqdarda benzin əldə edirik? Biz - hə. Odur ki, təcrübə keçirmək qərarına gəldik.

Təcrübə üçün biz Bakının altı ziyarət edilən benzindoldurma məntəqələrinə + daha 1 təsadüfən seçilmiş məntəqəyə yollandıq, Aİ-92 benzini və 7 bölgülü kanistr götürdük.

Məntəqələrdəki operatorları şübhələndirməməkdən ötrü, biz 10 litr deyil, "5 manatlıq" benzin doldurmalarını xahiş etdik. Nəticədə, benzinin qiymətinin 0,70 AZN olduğunu nəzərə alsaq, biz 7,14 litr yanacaq əldə etməli idik. Onun 0,04 litrini kiçik xətaya qurban verərək, 7,1 litr miqdarını əsas hesab edəcəyik.

Beləliklə, təcrübəmizin 1№-li məntəqəsi zooparkın yaxınlığındakı IST Petrol oldu.

Sevindirici hal idi ki, elə birinci məntəqədə yanacağın miqdarı 7,1 göstəricisinə çatdı. Bu zaman bizi hətta şübhə də götürdü: bəlkə bütün məntəqələrdə yanacağın həcmi ilə problem yoxdur?

Və biz növbəti yanacaqdoldurma stansiyasına - GUNEŞ Petrol-a yollandıq. O, təəssüf ki, bütün ümidlərimizi puç etdi. Məntəqə Azure biznes mərkəzinin yaxınlığında yerləşir.

Yeri gəlmişkən, əvvəllər bu məntəqəni yanacağın keyfiyyətinə görə tərifləyirdilər. Keyfiyyəti deyə bilmərəm (bu barədə bir azdan), benzinin həcmi isə cəmi 6,8 litrə çatdı. Beləliklə, əksiklik cəmi 4,3% təşkil etdi. Yəni 100 litrdə bu göstərici ən yaxşı halda 4,3 litr (3 manat) təşkil edəcək. Nəyə görə ən yaxşı halda? Ona görə ki, bütün avtomobil saytları əksikliyin ilk 10 litrdən sonra başladığı haqda xəbərdar edirlər. Əlbəttə, əgər yanacaqdoldurma proqramı müəyyən şəkildə sazlanıbsa.  

Biz isə Bədən Tərbiyyəsi və İdman Akademiyasının yaxınlığındakı ABU Petrol  məntəqəsinə yol aldıq.

Burada operator bizə eyham vurdu ki, yanacaqdoldurma məntəqələrində kanistrə benzin doldurmaq qadağandır. Amma yenə də benzini "vurdu" . Nəticə - 7,0 lirt. 

Təcrübənin növbəti ünvanı Nərimanov rayonunda yerləşən LUKOIL məntəqəsi oldu. 

Nəticə - 6,9 litr. Əksikıik - 2,9% .

Ardınca biz Gənclik metrosu yaxınlığındakı AZPETROL-a üz tutduq.

Burada bizi ilk məyusluğumuz gözləyirdi. Operator rəhbərliyin ciddi qadağasını əsas tutaraq, kanistrə benzin doldurmaqdan imtina etdi. Məntəqədən cəmi bir kilometrliyində benzinsiz qalmış zavallı qızın əhvalatını dinlədikdən sonra, o, 1 litrlik şüşəyə benzin doldurmağı təklif etdi. Amma düşündük ki, 1 litrlik şüşədə əksikliyi müəyyən etmək mümkün olmayacaq, təklilfdən imtina etdik.

Növbəti məntəqəmiz aeroport yolundakı SOCAR oldu. 

Burada da dəqiq xidmətin ikinci halı ilə rastlaşdıq - benzin arzuolunan 7,1 bölgüsünə çatdı.

Sonda isə biz tamamilə tanınmamış bhir brendin məntəqəsinə - Yasamaldakı Murad Petrol stansiyasına daxil olduq.

Sözün düzü, burada doldurulan benzinin miqdarı 6 litrə çatmasaydı, heyrətlənməzdim. Nahaq. Bizə cəmi 200 qram az "vurdular". Kanistrdə 6,9 litr benzin var idi.

Beləliklə, təcrübəmizin qalibi IST Petrol və SOCAR məntəqələri oldu. Bu yanacaqdoldurma məntəqələrində biz ödədiyimiz  həcmdə benzinə sahib ola bildik.

Lakin, bununla kifayətlənməyib, benzinin keyfiyyətini də yoxlamaq qərarına gəldik. Burada isə bizi ikinci uğursuzluq gözləyirdi - müraciət etdiyimiz laboratoriyalardan heç biri benzinin keyfiyyətini yoxlamaq məsuliyyətini öhtəsinə götürmədi. Kimisi dərhal imtina edir, kimisi nəyə görə bu sifarişlə məhz onlara müraciət etdiyimizi soruşdu, bəziləri bunu bizə nə üçün lazım olduğunu soruşur, öyrənəndə isə dərhal imtina edirdi.

Bununla belə, hansı yanacaqdoldurma məntəqəsində düzgün miqdarda benzin əldə etdiyimizi bilmək də çox vacibdir.

Yolunuz uğurlu olsun!

 


Şərhlər