Valideynlərin və ətrafdakıların laqeydliyi uşağa çox pis zərər verə bilər.  Danışa bilmədiyi və yaxınların diqqətini öz problemlərinə çəkə bilmədiyi üçün o, özünə qapılır və bir sıra psixoloji problemlərlə üzləşir. #MənimləDanış həştəqi ilə keçirdiyi yeni kampaniya ilə Təhsil Nazirliyi məhz buna diqqət cəlb etməyə çalışır.

Məktəb kollektivində tez-tez rast gəlinən hadisələrdən biri də bulliinq, yəni məktəb cəmiyyətinin ən zəif üzvünün aqressiv şəkildə təqib edilməsidir. Bullinqin səbəbləri çox fərqli ola bilir: bullinqi həyata keçirənlər bullinqə məruz qalanın valideynlərindən, maddi durumundan, yaxşı oxumasından, danışıq tərzindən, geyimindən və ya hətta saç düzümündən belə xoşlanmaya bilər. Bulinqin əsas səbəbi bullinqi həyata keçirənin həsədi və ya onun zəif olanın hesabına özünü təsdiq etmək istəyidir.

Çox vaxt valideynlər övladının bullinqə məruz qalmasından xəbərsiz olur. Aşağıdakı əlamətlərə diqqət yetirmək lazımdır:

• uşaq tez-tez tikanlı ifadələr və təhqiramiz sözlər eşidir, onun incidir və ona lağ edirlər;
• uşaq fiziki zorakılığa məruz qalır, özünü ondan qoruya bilmir;
• uşağın daimi dostu yoxdur;
• uşaq digər uşaqlarla oynamaq istəmir, onlarla ünsiyyət qurmaqdan çəkinir;
• uşaq məktəbə getmək istəmir, məktəbə getməmək üçün bəhanələr axtarır, qorxu əlamətlərini göstərir;
• uşaq tez-tez evə cırılmış paltarda, gözünün altı göyərmiş və digər zədə almış halda gəlir və bunu aydın izah edə bilmir, deyir ki, ayağı ilişib və yıxılıb;
• uşağı heç kəs öz ad gününə və ya digər tədbirə dəvət etmir, həmçinin o da heç kəsi dəvət etmək istəmir;
• uşaq oxumağa qarşı marağını tamamilə itirmişdir;
• uşaq sizə məktəb haqqında hansısa məlumatı çatdırmaq istəyir, məktəbdə özünü narahat hiss etdiyini göstərmək istəyir.

Təhsil Nazirliyi tərəfindən hazırlanan video geniş ictimaiyyətin diqqətini bullinq probleminə yönəltməyə və valideynlərin öz övladları ilə daha çox ünsiyyətdə olmasına hesablanmışdır.

#MənimləDanış