Fodors Travel turizm şirkətinin tərtib etdiyi reytinq cədvəlində Bakı funikulyoru Avropa funikulyorları arasında beşinci yeri tutub.
Birinci yerə tikilməsi ilə bağlı qərar 1891-ci ildə Paris bələdiyyə məclisi tərəfindən qəbul edilmiş Montmartr təpəsində yerləşən funikulyor layiq görülüb. Paris funikulyoru saatda iki min sərnişin daşıyır.
İkinci yer Budapeştdə Buda təpəsindəki funikulyor tutub. O, Avropada tikilən ikinci funikulyordur.
Üçüncü yer 1875-ci ildə sərnişinlərin istifadəsinə verilən Türkiyənin Tunel yeraltı funikulyoruna verilib.
Dördüncü yerə 1905-ci ildə işə başlayan Kiyev funikulyoru sahib olub.
Beşinci yerdə isə Bakı funikulyoru qərarlaşıb. Azərbaycanın bu yeganə funikulyoru 1960-cı ildə inşa edilmiş və 2012-ci ildə yenidən qurulmuşdur. Bu reytinqdə o "ən gənc" və ən modern funikulyorlardandır.
Bakı funikulyorundan sonra reytinqdə Fransanın Trepo və Lion, Çexiyanın Petrin, Portuqaliyanın Lissabon və İsveçrənin Quttanen şəhərlərindəki funikulyorlar yer alıb.
