Dünya və Azərbaycan psixiatriyasının ən böyük problemlərindən biri - STİQMATİZASİYA.

Bu problem haqqında böyük sayda məlumat vardır, amma yenə gündəlik rast gəlinən bir hal üzərində xatırlamağa ehtiyac görürem.

Xəstə dünən xəstəxanadan evə buraxılıb. Bu gün qardaşı 2 dəfə sakit olan xəstəni (qavrama pozğunluqları yoxdur, aqressiv deyil, suisidal tendensiya izlənilmir) yenə xəstəxanaya yatızdırmaq istəyir. Səbəb – xəstənin yoldaşı ilə yola getməməsi (ev problemi, xəstənin maddi vəsaitlərinin mənimsənilməsi, övladlarını onlardan ayırmaq və gizlətmək, dəstək olmaq istəməmək və xeyli basqa səbəblər ola bilər).  Təəssüf ki, psixiatrik xəstələrin hüquqlarının ailə üzvləri və bəzən həkimlər tərəfindən pozulması halına tez-tez rast gəlinir.

Düşünün, sizi görməniz zəif olduğuna görə, qolunuzun sındığına və ya artıq çəkinizə görə cəmiyyətdən uzaqlaşdırmağa çalışırlar (bu hallara belə rast gəlinir, amma çox az!).

Ruhi xəstə olmasında insanı günahlandırmaq, bu böyük dünyadan sağlamlıq durumuna görə kənar tutmaq şox böyük yanlışlıq və insanlıq adına bir ləkədir.
Psixiatr kimi iş təcrübəmdə ailənin, dostların, yaxınların dəstəyinin ruhi xəstəliklərin proqnozuna necə təsir etdiyini gündəlik müşahidə edirəm və bu, dünya psixiatriyasında elmi ədəbiyyat və gündəlik təcrübələrdə ən önəmli incəliklərdən biridir.

Ruhi xəstəliklərdən heç kim sığortalanmayıb!!! İstənilən yaş, maddi durum və dəri rəngində xəstələnmə mümkündür, psixi xəstəliklər çox və xeyli müxtəlifdir...

Diqqətli olaq! Ailəmizə, yaxınlarımıza, ətrafımıza qarşı... Psixiatra müraciəti gecikdirməyin. Ruhi sıxıntılarda utanacaq bir hal yoxdur və psixiatriya qanunvericiliyi sizi gizli yardim almaq hüququ ilə təmin edir.

Hər birinizə ruhi və fiziki sağlamlıq diləyi ilə

Psixiatr Əziz Mustafayev