Bakı Metropoliteni hər il öz sərnişinləri üçün Yeni il sürprizləri hazırlayır. Biz artıq Bakı sakinlərinin metroda Murad Dadaşov, Bəhram Bağırzadə və digər sənətçilərin səsini eşidəcəyi haqqında yazmışdıq, lakin stansiyalardakı bayram tədbirləri siyahısı bununla bitmir.

Yeni ili şəhərin mərkəzində möhtəşəm atəşfəşanlığını seyr edərək qeyd etmək istəyirsinizsə, ictimai nəqliyyatdan narahat olmayın: metro stansiyasına giriş saat 01:00-dək açıq olacaq. "İçərişəhər", "28 May", "Elmlər Akademiyası", "Koroğlu" və "Avtovağzal" stansiyalarında quraşdırılmış yolkalar bayram əhval-ruhiyyənizi bir az daha yüksəldəcək.

Dekabrın 29-dan etibarən "İçərişəhər" stansiyasında retro qatarla şəkil çəkmək mümkün olacaq. 1990-cı ilədək istifadə edilən A, Q və E («А», «Г», «Е») seriyalı vaqonlar məhz orada nümayiş etdiriləcək.

Şaxta Baba və Qar Qız vaqonlara daxil olub metronun ən kiçik ziyarətçilərini hədiyyələrlə sevindirəcək. 29 və 30 dekabr tarixlərində "İçərişəhər" metro stansiyasında uşaqlar üçün kloun və sehrbazların iştirak etdiyi yeni il şousu təşkil ediləcək. Böyüklər üçünsə "28 May", "Sahil" və "İçərişəhər" stansiyalarında (saat 12:30-dan 14: 00-dək) "Şağan" ansamblı çıxış edəcək.

Sizə Yeni il bayramını şən keçirməyi arzulayırıq!