Sizin dörd otaqlı mənziliniz var. Yaxın qonşunuzun isə iki otağı var. Başqa bir qonşunun isə - üç.

Birdən siz hiss edirsiniz ki, qarışıqlıq  vaxtı yaxınlaşır. Blokun böyüyü beşinci mərtəbədə yaşayır. Düz üç otaqlı evi olan qonşunuzun üzərində.

Blokun böyüyü -  sizin blokda və başqa bloklarda hörməti və nüfuzu olan adamdır. Amma birdən özünü qəribə aparmağa başlayır.

Blokun ab-havası korlanır. Bir zamanlar sizi qardaş adlandıran qapı qonşunuz bildirir ki, ev bölgüsü zamanı dörd otaqlı ev ona düşməli idi, sizə yox. O, bu məsələni uzatmağa başlayır. Blokun böyüyünün yanına gedir, nəsə danışır, məsləhətləşir. Başqa bloklara gedir, yenə də məsləhətləşir.

Nə isə, bir gün siz evə gəlib görürsünüz ki, qapı qonşunuz öz evindən sizin mətbəxinizə, ordan da yataq otağınıza deşik açıb. Yataq otağının girişini bağlayıb. Sizin mətbəxinizdən keçərək sizin yataq otağına gedir.

Siz də artıq nə mətbəxinizə, nə də yataq otağınıza girə bilmirsiniz.

Əvvəlcə siz onu başa salmağa çalığırsınız. Sonra hədələyirsiniz. Hətta döyməyə və güclə evinizdən çıxarmağa çalışırsınız. Ancaq o, blokun böyüyünə və daha iki qonşu blokun böyüklərinə zəng vurur. Onlar səni sakitləşdirməyə çalışılar, özünü ələ almağı məsləhət görürlər, çiyninə vuraraq, mübahisənin sülh yoluyla həll etməyə çağırırlar.

Siz məhkəməyə müraciət edirsiniz. Məhkəmə sizin mənafelərinizi müdafiyə edir. Qonşu məhkəməmnin qərarını saya saymır. Heç nə dəyişilmir. Hamımız bilirik, bu məhkəmələr necə işləyir, onların qərarları necə yerinə yetirilir.

Siz bütün nüfuzlu qonşuları iclasa dəvət edirsiniz. Soruşursunuz ki, ay balam, bu mənzil kimindir axı? Hamılıqla sizi göstərirlər.

Siz tələb edirsiniz ki, qonşunuz etdiklərinə görə cavab verməlidir. Hamı yenə çiyinlərini sıxaraq, münaqişənin sülh yoluyla həll olunmasını məsləhət görür.

Vaxt ötür. Qonşu artıq çoxdan sizin mətbəxdəki mebeli və qab-qacağı çıxarıb. Qalan nə varsa çürüyərək xarab olur. Yataq otağınızda səliqə yaratmağa və hətta bir neçə dəfə orada yatmağa çalışıb. Amma alınmayıb. Çünki özgəsinin yatağında yuxuya getmək hər adama qismət olmur.

Sizin mətbəxinizə və yataq otağına sahib olmaq onu bir o qədər də xoşbəxt etməyib. Daimi iş yeri yoxdu. Blok böyüyünün arabir elədiyi köməklik sayəsində birtəhər dolanır.

Siz isə bu vaxt səylə çalışır, pul yığır, avtomobil alır, idman zalına gedir, travmatik silah əldə edirsiniz. Bir sözlə, bütün binanın sizə qarşı olmasına baxmayaraq, mənzilinizi əvvəlki qaydada bərpa etmək niyyətindəsiniz. Lazım gəlsə, güc tətbiq edərək.

İllər ötür. Vaxtaşırı sizə blok böyüyündən və digər blokların böyüklərindən elçilər gəlir. Onlar sizin probleminizdən istifadə edərək, dərdinizlə oynayaraq, qapı qonşunuzu bu və ya digət tərəfdən yola gətirmək vədləri verirlər. Əvəzində isə... təkliflər edirlər, bəzən isə hədələyirlər.

Siz artıq 20 ildir ki, mətbəxsiz və yataq otaqsız yaşayırsınız. Ancaq hamısını qaytarmaq ümidini itirmirsiniz. Uyğun zamanı gözləyərək, hazırlaşırsınız.

Eyni zamanda, binanın sakinləri arasında münasibət pisləşib. Daha doğrusu, sizin blokun böyüyü ilə sakinlərin çoxu arasında.

Qonşu blokun böyüyü bütün binaya başçılıq etmək məqsədilə, sizin blokun böyüyünü da “sındırmağa” çalışır. Sizin böyüyünüz buna yol vermək istəmir. Beşinci mərtəbədəki qapı qonşularıyla o, dəstə yaradraq, sizin qapı qonşunuzu da həmin dəstəyə cəlb etməyə çalışır. Sizin mətbəxinizi və yataq otağınızı zəbt edən qonşunu. O, əlbəttə ki, razılaşır. Amma o qədər də razı görünmür.

Sonra, blok böyüyü sizin yanınıza gəlir. Başlayır nəsə danışmağa, mətbəxinizi və yataq otağınızı qaytarmaqda köməklik göstərməyi təklif edir. Ətrafı bu günə qoyan qonşunuza təzyiq göstərəcəyini söz verir. Sizə təzyiq göstərə bilmir. Ona görə də onunla hansısa dəstədə birləşməyi, o da olmasa, heç olmazsa qonşu blokun böyüyü ilə birləşməməyi xahiş edir. Bəli, binanı ələ keçirmək istəyən qonşu ilə.

Bu vaxt, artıq qalan dörd blokun böyüyü sizin blok böyüyünüzə qarşı birləşiblər. Onları bloklarının, demək olar ki, bütün sakinləri dəstəkləyir. Demək olar ki hamısı. Son illər ərzində xeyli böyümüş və güclənmiş daha bir blok böyüyü onlara qoşulmayıb. Onun bina üçün öz planları var.

Binanızdakı vəziyyətin nə ilə sona çatmasından asılı olmayaraq, siz 20 il öncə evinizə deşik açan qonşunuza mətbəxinizi və yataq otağınızı bağışlayardınız?

Çətin ki...

P.S. Bir çox avropalı və ya postsovet məkanında yaşayıb, Qarabağ problemindən xəbələri olmayan, gülümsəyərək: “O qədər il keçib. Bəlkə Qarabağın ermənilərdə qalmasına razı olub, dünyada və elə o Qarabağın özündə əmin-amanlıqda yaşayasınız?” deyən həmkarlarıma və ya tanışlarıma mən təqribən belə, buna oxşar bir əhvalat danışıram.