Ukraynanın Azərbaycandakı fövqəladə və səlahiyyətli səfiri Vladislav Kanevski və xanımı Bakıdakı Mərkəzi Qan Bankında qan veriblər. Ukraynanın Azərbaycandakı səfirliyinin əməkdaşları da donor olublar. Onların aksiyası talassemiyalı uşaqlara yardım məqsədi daşıyır.
Vladislav Kanevski, Ukraynanın Azərbaycan Respublikasındakı fövqəladə və səlahiyyətli səfiri. 47 yaş
Dünən mənim köməkçim mətbuatda belə bir məlumata rast gəlib ki, Azərbaycanda Talassemiya Mərkəzində talassemiyalı uşaqlara köçürmək üçün qan çatışmır. Sözün düzü, mən bu dəhşətli xəstəlik barədə ilk dəfə eşidirdim və dərhal başa düşdüm ki, kömək etmək lazımdır. İndi, bütün dünyada vəziyyətin çətin olduğu bir dövrdə, insan mərhəməti aspekti xüsusi əhəmiyyət kəsb edir.
Çətin anlarda həqiqətən ehtiyacı olan insanlara kömək etmək – bu, bizim hamımız üçün müəyyən bir çağırışdır. Bu insanlar üçün qan həyati vacibdir, bizdə – donorlarda isə təmənnasız olaraq xəstələrə kömək etmək imkanı var.
Həyat yoldaşımla birlikdə bu barədə oxuduqdan sonra, dərhal qan vermək qərarına gəldik. Bizim üçün bu hərəkət xüsusi simvolizmlə zəngindir. Axı, həyat davam edir.
Artıq bir ildir ki, mən Ukraynanın Azərbaycanda səfiri təyin olunmuşam. Biz Bakıya ötən il, elə Novruz bayramının ən qızğın çağında gəlmişik. Fürsətdən istifadə edərək, Azərbaycanın bütün vətəndaşlarını təbrik etmək istərdim. Bu, çox pozitiv bir bayramdır. İndi Bakıda əsl bahardır. Bu çətin vaxtda pozitiv hamımız üçün zəruridir.
Məmnuniyyətlə qeyd edim ki, bu gün Ukraynadan qayıdan Azərbaycan vətəndaşları və buradan vətənə dönən Ukrayna vətəndaşları üçün Ukraynanın UBA aviaşirkətinin xüsusi reysi həyata keçiriləcək. Bununla əlaqədar olaraq, bu məsələdə göstərdiyi yardıma və dəstəyə görə Azərbaycan rəhbərliyinə öz minnətdarlığımı bildirmək istərdim. Bundan əlavə, hesab edirəm ki, koronavirus pandemiyasının yayılmasının qarşısının alınması ilə bağlı vəziyyətə Azərbaycan tərəfi vaxtında və düzgün reaksiya verdi.
Karantin şəraitində bəzi tədbirlər vətəndaşlar üçün çox da rahat olmaya bilər, buna baxmayaraq bu tədbirlər öz nəticələrini verir. Ölkələrimizin sakinləri üçün bu infeksiyanın fəsadlarının azaldılması məqsədi ilə həm Azərbaycanda, həm də Ukraynada bütün zəruri tədbirlər görülür.
Mən çox istərdim ki, bir çox insanlar bizdən nümunə götürsünlər və qan köçürülməsinə ehtiyacı olan pasiyentlər üçün donor olsunlar. Biz diplomatik çağırışa start vermək qərarına gəldik: bu xeyirxah işdə estafeti Türkiyənin Azərbaycandakı səfirliyinə ötürürük və ümid edirik ki, o, davam edəcək! Qoy xeyirxahlıq davam etsin!
Stanislav Koval. 31 yaş
Mən təxminən beş ildir ki, Azərbaycandayam və bütün bu müddət ərzində hər zaman Azərbaycan xalqının mehribanlığı və qonaqpərvərliyi ilə qarşılaşmışam.
Buna görə də, 1500-dən artıq insanın yardıma ehtiyacı olduğunu öyrəndikdən sonra belə bir qərara gəldim ki, qan verməklə ölkənizdə keçirdiyim emosiya və hisslərə görə azərbaycanlılara təşəkkür edə bilərəm.
Üstəlik, öz nümunəmlə hamıya göstərmək istərdim ki, COVİD-19 infeksiyasının yayıldığı şəraitdə donorluq nəinki təhlükəsizdir, hətta həm ruhi, həm də fiziki sağlamlıq üçün faydalıdır. Mən bu günə qədər üç dəfə qan vermişəm. Karantin ətrafdakılara kömək etməyi dayandırmaq üçün bir səbəb və bəhanə deyildir.
Berejnoy Dmitri. 39 yaş
Mən əminəm ki, bu çətin dövrdə təhlükə altında qalan uşaq həyatından vacib heç bir şey yoxdur. Əgər kömək etmək üçün kiçik də olsa bir imkan varsa, bunu nə üçün etməməliyik?
Yevgeni Kostyuk.
57 yaş
Mən artıq Ukraynada 3 dəfə qan vermişəm. Qohumlarım, dostlarım və Taqanroqdakı uşaq evində xəstə uşaqlar üçün qan vermişəm. Özümü hər zaman yaxşı hiss etmişəm.
Artıq 2 ildir ki, Azərbaycandayam. Sizin çox gözəl mətbəxiniz var və qoyun ətindən kababınız çox dadlıdır! (gülür). Azərbaycanın Talassemiya Mərkəzində qan çatışmadığını öyrənən kimi, dərhal gəlməyə qərar verdim. Mən insanlara kömək etmək istəyirəm.
Yevgeni Osadçi.
33 yaş
Mən Ukraynada daimi qan donoruyam, artıq 12 dəfə qan vermişəm. Cəmi üç həftədir ki, Azərbaycandayam və bura mənim çox xoşuma gəlir. Düzdür, koronavirusla əlaqədar olaraq, demək olar ki, heç bir yeri görə bilməmişəm, amma nə etmək olar, karantin hamı üçündür.
Lakin uşaqlar üçün qan verməkdən ötrü bu gün maska taxdım və buraya gəldim. İndi özümü çox yaxşı hiss edirəm!
Axı biz azərbaycanlılarla dostuq. İmkanın olduğu qədər bölüşmək – düzgün hərəkətdir. İnsanlara kömək etmək lazımdır.
Azərbaycan Talassemiya Federasiyasının rəhbəri Nailə Quliyeva Talassemiya Mərkəzinin bütün pasiyentlərinin və onların doğmalarının adından Ukraynanın Azərbaycandakı fövqəladə və səlahiyyətli səfiri Vladislav Kanevskiyə, onun xanımına və Ukrayna səfirliyinin bütün əməkdaşlarına dərin minnətdarlığını bildirir! Uşaqlarımıza həyat bəxş etdiyiniz üçün təşəkkür edirik!
Talassemiya Mərkəzi üçün qan vermək istəyən hər bir kəs Mərkəzi Qan Bankına müraciət edə bilər.Qan Bankının ünvanı: Bakı şəhəri, Mirəli Qaşqay küçəsi, 87Qaynar xətt: 907
Fotoşəkillər: Ruslan Sonin
