Almadan hazırlanan bu spirtli içkinin nəyə görə sovet cizgi filmində təbliğ olunduğu mənim üçün hələ də sirr olaraq qalır.

Bəlkə Sovet İttifaqı bu içkinin  heç kimə məlum olmayan spirtsiz növünü istehsal edirdi? Ya da cizgi filminin yaradıcılarında biri sovet vətəndaşlarının bu içkiyə olan marağını artırmaq istəyib? Nə olursa olsun, bu gün sidr içkisindən söhbət açacağıq.

Beləliklə, görəsən alma pivəsinin vətəni haradır? Əslində, onu pivə adlandırmaq olmaz. Çünki hazırlanmasında nə mayaotundan istifadə olunur, nə də taxıllardan. Odur ki, sadəcə sidr. Alma və ya armudlu. Amma armud onun tərkibinə çox sonra daxil olub. Əhvalatımız almadan başlayır.

Qədim bir əfsanəyə görə, əcdadlarımız pivə və şərab içməkdən bezib, yeni bir içki hazırlamaq qərarına gəliblər. Uzun-uzadı fikirləşiblər. Belə düşüncəli günlərin birində 8-ci əsrdə yaşamış, frankların və lanqobardların kralı Böyük Karl...yox onun başına alma düşməyib. Başına alma düşən məşhur alimdən fərqli olaraq, o heç başını işlətməyi sevmirdi. Kral sadəcə çürüməyə başlayan alma torbasının üstünə oturur. Beləliklə də, birinci sidr meydana gəlir. Razıyam, əfsanə o qədər də lirik deyil, amma nə etmək olar? Ədalət naminə deməliyik ki, İncildə şekar adlı, çürümüş almalardan hazırlanan içkinin adı çəkilir.

Sidrin sənaye istehsalı mexaniki preslərin icadından sonra, 15-ci əsrdə mümkün olmuşdu. Elə o dövrdə də ən şirəli alma sortunun alınması məqsədilə seleksiya işlərinə başlanılmışdı.

Avropada almalı içkinin məşhurlaşması üzümün qıtlıq vaxtına təsadüf edir. Fransızlar diqqətlərini almaya yönəldərək, hər zamankı kimi, bu işə də böyük məsuliyyətlə yanaşdılar. Onlar sidrin təsnifatını yaradaraq, hətta bir neçə yeni əlavələr də etdilər. Onlar sidrin növlərini 3 qrupa bölürlər: cidre doux - şirin, tərkibində 1,5-dən 3%-ə qədər alkoqol olan, cidre brut - 4,5-6% alkoqollu və cidre tradition - 4,5%-də yuxarı alkoqollu sidr. Eyni zamanda, onlar Pommo adlı içki - sidr və kalvadosun (40%-ə qədər alkoqolu olan alma arağı) qarışığı olan içki də icad etdilər. 

Düzünü desəm, sidr mənim ən sevdiyim içkilərdən birinə çevrildi. Təəssüf ki, Bakıda ona tələbat çox azdır. Lakin axtarsanız, şəhərimizin məkanlarından birində hətta çəlləkdən tökülən sidr da tapa bilərsiniz. Odur ki, dadına baxın, təəssüratlarınızla bölüşün və unutmayın ki, hər şey qədərində gözəldir.